孖妹S檔案：港股仙氣夠 惡鬥五窮咒
港股似仲有一陣仙氣，恒指上周升番少少，孖妹好想預測五窮嘅魔咒最終會唔會打破。上一期訪問咗江湖老手，人稱「中國巴菲特」嘅李馳，佢話依家係播種期，撈平貨嘅好時機。今集就走訪大學，聽吓飽讀詩書兼投資比賽得獎者嘅投資精英，對後市又有乜嘢高見！
任：中大商學院二年級生 任寶泉（Alfred）
何：中大商學院二年級生 何震邦（Ambrose）
Kitty：人哋話書中自有黃金屋，咁係咪讀得多書，投資真係會叻啲？
彩兒：話就話咁講，不過理論歸理論，都要應用到！如果要考考自己投資技術，點可以唔落場，賺蝕見真章。
Kitty：咁呢兩位投資比賽得獎者嘅投資智慧，真係唔講得笑。
恒指或爆邊 跟風去槓桿
任：港股好大機會向下插，依家唔係入市時機。好多Trader都係炒波幅，所以港股爆邊，係千鈞一髮嘅事。我覺得一七年牛市二期已經過咗，所以保守啲好，我都唔做咁多槓桿，年內目標係持盈保泰！始終中國積極去槓桿，如果我哋唔跟埋去槓桿，咪自討苦吃？
何：我都係咁諗，睇淡後市多啲。
Kitty：但單單話大家都炒波幅，港股就會跌，好似牽強咗少少。
任：嘻嘻！股市點行，點可以唔睇實美債及美匯走勢呀。
何：全球股市唔明朗因素咁多，中美貿易糾紛遲遲未解決，真係搞到大家陀陀擰。依家分析後市，睇美國總統特朗普嘅Twitter貼文，仲好過睇技術圖表，哈哈！唔似一七年，家下股市波動大咗，我都買定啲黃金ETF（交易所買賣基金）避險先。
黃金期貨Chok 不宜入手
Kitty：上個禮拜，美國決定退出伊朗核協議，全球地緣政治風險再升溫，但黃金價格未見飆升。
任：吓！買黃金？我唔贊成。因為中國積極爭奪石油價格以人民幣定價，期望取代美元，已經喺上海期貨交易所發行數個原油期貨合約。但因人民幣暫未做到自由流動，所以啲原油期貨合約好大機會先以黃金結算。美國見狀，仲唔反擊，令到黃金期貨價格Chok上Chok落，以致中國原油期貨合約結算有難度。
何：你講得有道理，我都要小心啲。
Kitty：世界黃金協會統計，截至一七年第三季，全球擁有最多黃金儲備的國家依然係美國，其黃金儲備量達8,133.5噸；中國僅有1,842.6噸。唔怪得知美國有咁大Say。
美匯升 北水南下誘因減
彩兒：你咪話，美匯及美債左右港股命運，點解嘅？
任：睇睇一七年初到一八年一月嘅大牛市，美匯指數轉弱，人民幣相對轉強。因美元同港元掛鈎，港匯都跟隨美匯轉弱。所以，內地資金南下買港股時，因匯率差價而令港股有折扣，所以先會見咁多北水湧過嚟。又望望一六年五月至一八年五月恒指及美匯指數嘅相關系數為負0.72，就證明兩者呈高度反向關係。
彩兒：但美匯指數自四月中似進入咗上升軌，以你上述嘅邏輯，港股會一路冇運行？
任：冇錯，我估美匯指數已見底回升，北水南下嘅誘因減少，港股繼續轉弱。參考一八年一月尾後現金流，恒指喺33,484點見短期頂部，美匯指數同時喺88左右見底。滬股通今年四月買入成交額1,035億元人民幣，較一月跌兩成。
另外，美國總統特朗普喺一七年揚言要令美國企業回歸，咁美元呈弱就有利美企沽售海外物業時兌換更多美元；到今年，要兌美元嘅企業都兌得七七八八，佢應該會設法令美元持續轉強，增加企業揸住嘅美元嘅購買力。
新興市債弱 有違約風險
Kitty：預計美匯回升，咁你有冇投資美債相關產品？
任：冇喇，投資本金有限，亦唔考慮買美債ETF，因為佢嘅管理費都幾貴。
彩兒：提一提，睇美匯，都要留意收益率曲線，最近曲線趨平，即美國短期及長期債券收益率不斷收窄，意味投資者對未來經濟唔係好樂觀。所以，對於買美國長債有啲猶豫。
Kitty：不過美國聯儲局六月好大機會加息，美元進一步轉強，新興市場貨幣就相對偏弱。
任：係呀，最近阿根廷披索一度跌破歷史新低，其央行為咗阻止貨幣繼續貶值，喺一周內三次加息至40厘。所以，我覺得只要美國加息周期及縮表計劃未停止，新興市場貨幣會繼續貶值。特別係啲持有大量美元債務嘅國家，要好小心佢哋嘅債務違約風險。
Kitty：咁唔買新興市場債喇！不如諗吓中國短期債，債息超過3%；人民幣一年定存息率亦有約4厘。
彩兒：然而，六月A股入摩，中金估計首批被納入嘅A股共229隻，你哋有冇留意？
A股下月入摩無助炒上
任：A股六月入摩唔會令A股炒上。中國提倡去槓桿，經濟只會緩慢增長。而部分中國企業都係以債度日，大股東用自己嘅股票抵押畀銀行，再用借番嚟嘅錢回購公司股票。咁去槓桿時，銀行向企業Call Loan，一旦還唔到，銀行沽抵押品，咁公司股價仲唔大插或閃停？
我覺得A股入摩難炒起內地市場，目前外圍因素唔明朗，而內地投資者都更理性，唔再熱炒，美債息不斷抽升，與其他國家嘅債券差價進一步收窄，咁佢哋嘅吸引力愈嚟愈低。
定存利率抽高逼港加息
彩兒：港息不斷上升，香港四大銀行都先後出手，上調港元定存息率，港元12個月定存息高見兩厘。定存息率抽高，咁銀行咪好快要調高貸款息率？
彩兒：現時主要銀行提供嘅最優惠利率（P按）為5厘或5.25厘，實際按息為2.15厘；而業主亦可敍做拆息按揭（H按），通常會採用銀行公會一個月拆息作基準，近日就徘徊1厘水平。
任：係囉，如果香港存款利率持續攀升，存款利率高於香港銀行貸款息率，咁銀行咪要做蝕本生意囉。相反，美國減稅，財赤增大，惟有增發更多美債，導致美債息趨升。
一旦美債息攀升，而實際按息維持2.15厘封頂位，令美債息高於香港樓按按揭息率，香港業主只要申請按揭貸款再買入美債，就可以做套戥喇。所以，我估香港必然加息，今年六月或七月啩。
Kitty：你哋喺上年年尾嘅比賽咪估中咗HIBOR會續升，叻叻！究竟你哋用咗咩指標？
何：睇銀行體系結餘、美國縮表及美國聯儲嘅加息步伐、貿易逆差同失業率。
Kitty：自四月十二日以來，金管局曾經13次掃入港元捍衞聯匯，累積涉資513億港元，令銀行體系結餘降至1,285億港元。
投資策略：揸港鐵煤氣 博逆向ETF
Kitty：到底你哋炒緊咩？
任：我用咗幾十萬元投資，兩成資金泊喺啲公用股，包括港鐵公司（00066）及香港中華煤氣（00003）；兩成現金。另外四成做逆向ETF或VIX ETF，因為市跌，一般VIX會抽升。其餘兩成做期權淡倉或者短炒。
彩兒：你睇淡後市，買入反向產品，好正路呀。
何：我嘅投資本金就得幾萬蚊。一半買啲藍籌，望抗通脹；另外兩成短炒指數，其餘就買ETF。
任：炒指數唔使理板塊表現等非系統性風險，比分析個股簡單少少。
Kitty：市盈率（PE）你哋睇唔睇？
睇實資金流 免再輸鑊甘
任：我覺得，美國量化寬鬆（QE）前，炒股仲着眼PE等基本分析，QE後，睇資金流仲實際，我亦採用江恩理論選股。
Kitty：聽你嘅口脗，你似乎喺股場飽歷風霜，嘻嘻。
任：一六年股市見底，我仲學人炒熊證，點知人行霎時降準，股市爆上，我隻熊證畀人打靶，真係輸得好甘。
何：我都試過大蝕！今年二月，我用咗幾萬元買咗隻好高槓桿嘅指數牛證，喺打靶前一刻先忍痛離場。呢個係好好嘅教訓。
Kitty：有失必有得嘅！
彩兒、Kitty