聯儲局按兵不動，聲明暗示六月出手。周三晚美股低收，港股打回原形。上落市中最慘係期指及牛熊證玩家，咁落去輸part都輸死。
上星期恒指一度跌穿3萬點，啱啱殺到落牛證重貨區又再掉頭，以為個市大難不死會有料到，誰不知道指又縮落24,000點樓下，依家10天、20天及50天線都纏埋一齊，差距只得326點，短期插穿同升穿平均線，都變得意義唔大。
值得留意，二月開始個市逢彈必散，無疑是重磅股騰訊（00700）由股王變咗佗衰家，大股東Naspers批完股後級級落。缸邊流傳批股接貨的對沖基金有專登攞貨質低之嫌，本來是半信半疑，依家睇番又唔似空穴來風。
小米搶飲香港同股不同權上市的頭啖湯，市傳預計集資額高達780億元，大股東雷軍任主席的金山軟件（03888）當正影子股嚟炒，升4.6%收報24.75元。
從IDC數據，今年全球首季智能手機出貨量按年跌2.9%至3.34億部，其中內地廠家出貨量，乃一三年第三季以來首次跌穿1億部。
今時今日中國人人有機用，智能電話市場飽和，實在似一二年個人電腦市場光景，未來只怕光輝不再。
喺三星、蘋果公司同華為之後，小米排名全球第四，首季出貨量2,760萬部，按年勁升86%，升幅比國產品牌華為的13.8%，以及第五名OPPO的7.5%倒退，拋離幾條街。勁成咁，意外是小米首季在中國出貨量實際跌近一半，條大數咁勁，係拜低端機款主要係印度及東南亞銷售爆燈帶動。
小米久聞樓梯響的招股，盤數好似飲咗咖啡溝紅牛般咁興奮！真係千億美金估值上市的話，撇除會計因素，往績PE都仲要過百倍，古勝唔敢亂畀建議大家抽唔抽，而自己則會買定花生，欣賞幾間保薦行做呢單大生意的功架！
古勝