絲絲講場：Tesla連蝕五季馬斯克發窮惡
美國電動車生產商特斯拉（Tesla）第一財季業績出爐，勁蝕7.1億美元（約55.4億港元），連續五季錄破紀錄虧損，公司續燒錢。惟最精彩部分反而係舵手馬斯克喺分析員會議上爆Seed！
「驚就唔好買Tesla股票」
Model 3自舊年七月投產後，生產進度一直落後目標，加劇外界對Tesla嘅財政憂慮，沽空投機者亦虎視眈眈，可能因為種種壓力，而令馬斯克忍不住爆煲。
當分析員喺會上追問有關Tesla財務問題同Model 3訂單時，馬斯克即嚟料，形容提問「太枯燥」、「悶蛋」，話「啲蠢問題唔Cool」，又話「啲問題咁Dry，簡直殺死我！」總之就一概唔答。
馬斯克又話自己無興趣為即日鮮炒家更新資訊，建議投資者若擔心股價波動，就唔好買Tesla股票。
馬斯克仲批評媒體質疑自動駕駛安全嘅報道「太過分」，話啲「不負責任」嘅記者咁寫會令駕駛者關掉系統，可能因而累死人。至於會上唯一利好消息，可能係馬斯克透露最快第三季公布中國廠房嘅選址。
呢排啲新聞難免令馬斯克躁，事關最近有車主留意到，Model 3車廂倒後鏡上方，多咗個疑用作拍攝車內情況嘅攝錄機，引發私隱安全疑慮。睇番Model 3說明書，只係話個攝錄機「或於Model 3軟件更新時配合新功能啟用」，仲提醒車主切勿阻擋鏡頭。有消費者就此查詢，但Tesla無解釋，淨話啟用鏡頭前要作系統升級，屆時會再作通知喎。
講番馬斯克喺分析員會議表現劣評如潮，當然要付出代價，Tesla股價喺周三市後交易時段應聲急插最多6%，喺周四正式交易時段低見276.78美元，挫8.09%。
余絲韻