絲絲講場：貝索斯死亡問號嚇壞高層

貝索斯習慣親自睇客戶嘅投訴電郵，佢Forward畀相關高層時，唔講多，只齋附送多一個問號。

呢個奪命死亡問號簡直勾魂，啲高層一接，手上有乜都拋低，要即刻研究。做高層嘅，有「好嘢」當然會同下屬分享，於是亦Forward埋畀下面嘅經理，就係咁，「大件事」人人有份。

開會需準備6頁紙Memo

其實冇乜嘢嘅，大家只不過係要日以繼夜，盡快搞掂件事，仲要寫個堅有料到嘅書面交代。留意番，重點係「書面」兩個字。

貝索斯對書面報告有幾重視？嗱，佢開會禁用Powerpoint，下屬開會前要準備定6頁紙嘅Memo，Point Form佢唔收貨，嫌唔夠細緻冇Heart，啲Memo要有題目、用有動詞嘅完整句子。

一入房開會，佢會畀半粒鐘所有人各自靜靜「溫」晒呢6頁紙Memo先，然後先准開聲討論。

佢喺最近封「致股東信」上解釋，話長Memo可以令寫嘅人充分理解討論主旨，佢睇重嘅係「用功」，而非「速度」，事關寫一份出色Memo，分分鐘要用上一周或更多時間浸出嚟。

呢種開會文化，貝索斯亦自認畸形，佢話「係似中學生，咁樣佢哋先會真係睇份Memo，冇得扮冇得齋吹，咁開會先會有高質嘅討論。」唔好忘記，亞馬遜係網上書店起家，閱讀可以話係貝索斯嘅DNA。

咁嘅壓力下，人工又點？監管資料披露，亞馬遜員工舊年年薪中位數2.84萬美元，除開大概月入1.84萬港元，同Facebook（Fb）嘅每月大概15.6萬港元差一大截！但亞馬遜龐大嘅物流團隊都係藍領族居多，係冇得同Fb、蘋果公司等科技巨頭比o架喇。

余絲韻