Market Insight：石油股升勢有望延續

人行降準後，昨日內銀股繼續發功，加上國際油價重返一四年底水平，「三桶油」齊見火燒冷灶，帶動港股再下一城，連升兩日，恒指收報30,708點，成功收復10天及20天線，即市更叻到觸及50天線阻力30,761點。不過，純睇走勢，恒指一月底高見33,484點創歷史新高之後，受美國通脹預期升溫左右，二月插穿三萬點落到29,129點，大市至今都唔肯走出這個大型上落區。

兩大因素左右港股

後市是龍是蛇，有兩個唔能夠輕視的因素，一是股王騰訊（00700）大股東Naspers批舊股後，昔日單天保至尊，撐起港股的威力似乎已唔見咗，股價每次在405元配售價樓上，都有一道無形天花板壓住，接貨者何方神聖？睇好定睇淡？大家都係估估吓。不過，睇走勢短期好難期望憑騰訊帶個市往上破關。

其次是，金管局近日頻頻接港元沽盤，不過一個月港元同業拆息昨日升到0.949厘，但同一個月美元拆息，仲有近1厘差距，有相當充分誘因吸引匯商繼續沽港元買美元套息。發展落去，有朝一日銀行結餘落返去數百億，拆息上得更快，股市可唔可以當無到，古勝是充滿疑問！

同股不同權架構公司，講到最快今年年中有第一間來港上市，但今年新股的重頭戲，應該不是小米或者中資科技獨角獸，而係沙特阿拉伯旗下國營石油公司沙特阿美。

自沙特為首的石油輸出國組織協商減產，畀美國頁岩油打得半死的國際油價，輾轉由一六年最低26美元，依家去返69美元附近，創三年半新高。油價咁勁，皆因外媒報道指沙特趁減產協議屆滿前，希望將油價再推高，去到每桶80至100美元。

托價助巨無霸上市

由一六年沙特帶頭減產托住油價，到去年協商油組成員延長減產期限，再調高油價目標（未證實），已好清楚，明顯係一步一步為親生仔沙特阿美上市造勢。用到國家級聯盟推間公司爭取高估值，無論由陰謀論角度抑或純粹當連續劇追看，都認真夠花生。

早排油價喺60美元時，有大行估沙特阿美估值高達2萬億美元。或者大家無概念有幾勁，大概等於全球最大市值兩間公司即蘋果公司加埋Google再多兩成。如果油價中短期真係衝上100美元，沙特阿美值幾錢？自己諗諗。

不過，咁大單上市生意，牽涉既得利益眾多，古勝自問唔識睇油價，惟斷估沙特阿美有聲氣上市前，油價都唔散得，石油板塊短期如果回落番些少抖抖氣，可以諗吓。

古勝