近期乜都講「佛系」，最近有間「佛系」公司想A股上市，但就過唔到中證監「五指山」。
講嘅係管理四大佛教名山之一普陀山嘅「普陀山旅遊發展股份」，佢哋舊年六月申請A股上市，排咗隊九個月，點知中證監日前一聲嗌停，申請即被要求撤回，原因係「中證監嚴格落實宗教事務局等部門有關治理佛教、道教商業化問題的文件」。
其實一直以來，大眾都對佛門清淨地淪為旅遊景點有異議，普陀山呢單「佛系IPO」觸礁都非意料之外。其餘三座佛教名山中，峨嵋山同九華山分別早已喺九七年同一五年上市，而五台山舊年傳有計劃上市，唔知五台山會唔會都要「隨緣」呢？
余絲韻