絲絲講場：邁耶湊仔毋忘舊公司

講嘅呢啲B，其實係科技初創公司，靚媽同前同事搞咗間名為Lumi Labs嘅創新科技培育公司，專注消費媒體同人工智能領域。「Lumi」喺芬蘭語解作「雪」，佢好鍾意雪，連當年結婚都係以飄雪做主題。

雅虎一役學識「時機」

靚媽靜咗一輪出番嚟，好多嘢不吐不快，尤其舊公司。佢話喺雅虎做嘢，見到好多優秀同事努力做好產品，但管理層同董事局就做錯好多決定。

「有日我同囝囝砌積木，城堡砌好後突然冧咗，囝囝冇晒心機。我同佢講，我哋既然砌到過，證明方法可行，只要重新再砌一次就得。忽然我就諗起雅虎。」佢話喺雅虎一役得到嘅教訓係，時機就係一切。

咁多年，邁耶同佢管過嘅科企一齊大，由幾十人嘅初創變成巨無霸，管理方法完全唔同。講到凝聚同事嘅技巧，佢話可按公司規模分階段。

首先，初創得幾十人時，啲人純因公司成立理念吸引，自然同你一齊打天下。

當公司去到100至1,000人，就進入決定性兼艱難階段，屆時處理薪酬策略要好小心，要吸到啲與你目標一致嘅人才，你唔可以待薄佢哋，但又唔希望佢哋齋睇錢份上而來，佢話呢個係睇錢同使命感之間嘅取捨。

當公司規模超過1,000人，佢話已建立公司文化同使命，屆時你問員工點解加入公司，答案隨時係因為佢鍾意呢度嘅文化。靚媽「湊人」呢幾招，收到未？

余絲韻