絲絲講場：Fb月薪15萬 多大摩一倍
Facebook（Fb）近期雖捲入洩漏資料風波，但仍然係炙手可熱嘅科技巨頭，睇監管機構文件，Fb舊年員工薪酬中位數超過24萬美元，除開即係月入15.6萬港元！係325家已披露相關訊息嘅標指成分企業中第二高，比摩根士丹利嘅員工薪酬中位數高近一倍。
朱仔總報酬舊年7千萬
Fb教主朱克伯格（朱仔）雖然舊年只係象徵式收取1美元底薪，亦冇拎花紅或者任何股份獎賞，但佢嘅總報酬成個Package就高達超過885萬美元（近7,000萬港元），幾乎日袋19萬港元，較Fb員工薪酬中位數高近36倍。
呢885萬美元幾乎全部係保安同交通開支，朱仔舊年呢類開支急升54%，部分原因係佢個跨越美國三十州嘅巡迴之旅。
科技人才吸金力有幾驚人？連舊年第四季先首次有錢賺嘅微博網站Twitter，早前披露舊年員工薪酬中位數有16.1萬美元。而暫計員工薪酬中位數最高嘅係生物科技公司Incyte，達25.3萬美元。
余絲韻