絲絲講場：楓葉教育Sell高端 教中學生揸飛機

話說楓葉教育（01317）舊年十二月收購咗深圳市伊思頓龍崗書院，嚟緊九月該書院就會改名做「深圳楓葉國際書院」。話明係國際學校，課外活動多就梗嘅，但點諗到會連飛機都有得學揸！

深圳國際學校招生

深圳楓葉國際書院執行校長格倫‧波西斯爾就話，學校搞咗個飛行模擬室，等學生可以學吓航空科學知識同揸吓無人機。若高中三年入讀深圳書院，仲可以參加同易航航空合辦嘅國際航空班。

學費方面，楓葉教育高級副總裁、首席財務官兼執行董事張景霞話，該校係楓葉第一間深圳校園，仲係集團現時最高端嘅學校，學費定價都較高。小學至高中盛惠一年12.8萬至19.8萬人仔。

校長波西斯爾話，讀楓葉學校唔使買債券，通過面試就讀到，如果插班要過埋筆試。張景霞話，集團收生對象係中產或以上嘅家庭，學費定價亦參考當地家庭經濟能力。各位家長又點睇？

余絲韻