Market Insight：避險資金捧新能源股

美國銀行股首季業績陸續出籠，有炒過龍見光死的情況。摩根大通首季盈利破紀錄，上周五股價卻反高潮，累埋其他銀行股，道指跌122點。港股夜期比日市再跌82點。港匯偏軟，金管局連番接港元沽盤引發拆息抽高，銀行體系結餘開始縮到落1,700億元附近，即使財金大員話結餘幾百億已經夠有凸，但資金持續流出，心理及實際上對港股都係弊多於利。

淡友搵食 瞄準騰訊

被女股神欽點話騰訊（00700）兩年內可見1,000元，真係咁啱都得咁蹺，一講完騰訊走勢即見轉弱，上周三高位仲有425.6元，周五得番408元，與早前大股東Naspers減持價405元已是一步之遙，缸邊友自然將責任歸咎好日唔介紹的女股神燈死騰訊。

恒指成分股中，騰訊業績增長雖然標青，惟估值也「傲視同儕」，往績43倍市盈率，較平均13倍的成分股高出幾條街。近年中港基金因為一隻騰訊贏到開巷，眼見騰訊長升長有，200元、300元、400元關口一個接住一個咁破，基金經理已習慣有騰訊得天下。要跑贏行家，就必然要揸得比其他同行更重倉，亦形成高估值的騰訊，未必係價值投資者杯茶，卻肯定吸引咗一大班趨勢投資者進駐。

論基本因素，騰訊固然無大問題，至少其第四季業績要搵嘢彈無疑是雞蛋裏挑骨頭。近期弱勢主要因持貨N年的Naspers突然跑出嚟減持，加上高管跟手出貨，破咗個「勢」。

騰訊年初至今行咗個雙頂出嚟，以往淡友聞騰訊色變，近排變咗冇牙老虎，要留意近幾個交易日沽空佔成交持續高於一成，要小心係淡友部署搵騰訊嚟食大茶飯。睇走勢，398元頸線十分關鍵，如果再失守，單係趨勢投資者爭相逃生都唔得掂。

龍源業績料有保證

早幾日發改委公布今年首季全國發電量1.57萬億千瓦時，按年增長10%，其中潔淨能源好似風電及太陽能發電增長分別達37.9%及58.7%，較傳統火電的8.7%增長快。在追求環保及經濟可持續發展下，潔淨能源股仍可睇高一線，尤其在中美爭拗依然忽冷忽熱，主打內需的新能源股可吸引更多避險資金捧場。

風電股中，最近被幾間大行唱好的龍源電力（00916），上月由50天線的5.36元起步，愈升愈有，上周五見7.04元的一年半新高。國家能源局要在二○年前解決棄風限電的問題，今年龍源預測棄風限電率會進一步降低至7%左右，業績應有保證，市盈率10倍唔夠，如果能夠衝穿一六年中阻力7.2元，上面大把世界。

古勝