Market Insight：藍籌食品股再度發力

人民銀行行長易綱在博鰲論壇上，宣布五月一日開始中港互聯互通額度擴大4倍，滬股通及深股通每日額度由130億元人仔，增至520億元人仔；滬港通及深港通南下額度，每日由105億元人仔升至420億元人仔。比着過往港交所（00388）股價恐怕已經升到爆，結果事與願違，昨日股價上到270.4元，破一破20天線經已縮番轉頭，埋單升3.8元收264.6元，同三月初高位292.4元比較，仲差成廿幾蚊。

查實互聯互通開通以來，有幾多日額度用得爆，心水清的投資者應該知道，根本一隻手數得晒，就算畀夠每日千億額度，都只係擺多過用。

騰訊變金牛不是夢？

此外，港交所雖然口口聲聲話滬深兩市係合作關係，但係近幾個月，大家睇見急急諮詢修例，想吸同股同不權獨角獸公司來港上市，另一邊廂，深交所大員隨即講明會特事特辦，打條金樓梯畀一班中資科網巨擘經CDR重返A股市場。到底阿爺真係咁睇港交所枱戲，定係兄弟爬山，各自努力，似競爭對手多啲，港交所捧場客自已要諗清楚。

有女股神之稱的劉央揚言，啱啱畀大股東Naspers減持的騰訊（00700），兩年內可以見1,000元，以昨日收419.6元計，即使唔計股息，就算無女股神自稱低於405元撈咗貨，現價衝入去，未來兩年複合年回報都仲有54%，仲使做！到底真知灼見抑或死亡之吻？大家自行判斷。

如果真係變金牛股，相等於騰訊一八年92倍市盈率，市值9.4萬億元，較周二美國蘋果公司收市市值仲要大三分之一。睇見堆數字打冷震之外，亦不禁佩服講得出口的勇氣。古勝先睇短線返回批股前裂口位阻力438.6元樓上，並且收市企住，講上面睇幾多都未遲。

萬洲有追落後本錢

前稱「合生元」的H&H國際（01112）股東批股，但內需股依然各自各精彩。統一企業（00220）升2.9%見7.7元，同年初高位阻力7.88元僅一步之遙。中國旺旺（00151）亦連續兩日大成交搶高，昨日升0.7%報6.57元。

之前中美兩國隔空的貿易口水戰，咁啱在美國及中國賣豬肉製品的萬洲國際（00288）慘成淡友攻擊對象，股價曾跌穿8元。

即使萬洲高管解畫，話主要收入來源美國史密斯菲爾德，主打肉製品不受影響，悲觀股民都當睇唔到。不過，隨着中國以削減關稅，降低外資在金融行業准入門檻，以退為進回應美國，加上股市亦開始對貿易議題麻木，估值吸引的萬洲，應有追落後本錢，不妨睇吓有冇機會在10天線8.4元附近，買番些少貨壓倉。

古勝