絲絲講場：德央行晒金磚定驚

出書兼保證儲存妥當

仲記唔記得早幾年德國央行話要將自己存放喺海外央行嘅部分黃金調回國，該行舊年話已成功將存放喺美國紐約同法國巴黎約583噸黃金運返德國後，似乎仲係擔心大家唔信佢，索性本周起一連六個月搞個黃金展覽，展出該行金庫入面最有趣味嘅金條同金幣收藏。

除咗展覽，德國央行今個月初仲出咗本《德國人的黃金》嘅書，該行理事蒂勒聲稱，可以畀讀者感受到好似黃金就放喺佢哋手上咁，仲話保證國人嘅黃金以最高規格保存同管理，未來亦如是。

其實，德國央行勞師動眾將大批黃金調回國，部分原因係近年德國國內對離岸黃金係咪真實存在嘅爭論沒完沒了，甚至有傳聞話黃金已被再抵押、租咗或賣咗，甚至可能已被熔咗。為咗平息市場疑慮，該行搞展覽等大家驗明正身都好正路，有實物有真相嘛！

余絲韻