孖妹S檔案：商科生炒股投資 各有秘技

凌：理大金融學碩士生　凌俏

楊：公開大學會計學學生　楊天問

鍾：理大金融學碩士生　鍾菁

Kitty：我發誓「唔要做老餅！」，保持思路年輕，咁就可以百毒不侵。

彩兒：啱。能睇穿邊個喺度講笑，冷靜分析時局，就係做精明炒家嘅第一步。你哋點睇中美貿易戰？

鍾：我會緊貼中美貿易戰最新發展，但唔會對個人投資有太大影響。不過，無論係乜嘢黑天鵝引發股災，我已諗好避險方法，隨時將大部分投資套現轉做黃金。因黃金以美元計價，抗跌力強。我暫時買咗幾百元黃金，試吓玩。

楊：中美貿易戰影響投資者情緒，二月美股及港股曾大跌，最近負面新聞多多，聯儲局加息、科網股狂插，料近期港股及A股會持續波動。

彩兒：你哋近來買咩股票多？

凌俏	楊天問	鍾菁

參考理論 擅長睇財務數據

凌：一直以嚟都係炒A股，唔炒港股，因對A股熟悉啲。我買過格力電器（000651.SZ）、中國平安保險（601318.SH）、比亞迪（002594.SZ）及華夏幸福（600340.SH）等股份。

開頭係家人炒，然後聽佢哋建議跟住買，之後自己慢慢開始鑽研，揀心水股。

彩兒：有咩獨門揀股秘方？

凌：我揀股時，會參考投資理論，如「就謠言而買，就事實而沽」。平保公布業績前，大家憧憬佢業績好，所以紛買入，令股價飆上；但業績公布後，表現未符預期，股價就轉跌。

彩兒：由平保公布業績三月二十日當日起計，股價連跌八日，跌幅逾10%。

凌：仲會睇公司業務發展前景，然後用技術分析睇圖搵入市機會。我大學主修會計，對財務報表上嘅會計指標，包括市盈率、負債比率等較敏感。

彩兒：覺得自己屬於咩類型投資者？

凌：短線穩陣炒家！我習慣升市揸幾日、跌市走幾日。不過又未算係超短線、超貼市，因自己仍係學生，所以唔可以成日望住個市睇實資金流，以及股價有咩異動，做即時反應。有時落堂睇番，就發現錯失唔少投資機會。

Kitty：我總覺得，喺A股市場投資嘅大媽十個有九個都係聽消息入市。你覺唔覺得自己與眾不同，除咗唔係大媽，仲係少有包括技術分析與價值技資法嘅A股炒家？

凌：可能我保守啲，所以一定要做夠功課，有十足把握先入市。投資表現暫時平平。我年幾前開始投資，初期投入嘅20萬元喺上年大升市曾賺逾15%，但喺今年初嘅波動市又輸番少少，依家帳面剩逾21萬元。

嫌港樓升幅遜 吼成都

Kitty：呢排環球股市勁動盪，有賺算唔錯喇！

凌：坦白講，最賺錢嘅當然投資物業，我最近留意緊成都嘅物業。

彩兒：你唔諗住買港樓？

凌：雖然我有諗住喺香港搵工，同埋香港租金收入高好多，如持有一間市值800萬元嘅港樓，月租回報逾兩萬元唔難，但同樣市值嘅內地樓，月租可能得幾千元，但咁樣唔代表買港樓最着數。港樓真係好貴，且香港樓價升幅遠不及內地，內地樓兩至三年隨時翻倍。

彩兒：市場開始留意避險產品。你有冇買紙黃金？

凌：暫未持有黃金，但睇好黃金升值潛力，因黃金屬稀有資產。若要避險，我會持多啲現金。另我會分散投資，部分買股票及基金，部分用嚟供樓，其餘放啲做活期存款，買醫療保險，而梗係唔少得用咁啲喇。

炒藍籌牛熊 博Chok市賺錢

Kitty：聽聞你對香港有種情意結。

楊：無錯！我炒港股，唔炒A股。

彩兒：點解？你唔係對A股熟悉啲咩？

楊：因我覺得港股走勢易啲捉路。香港醫療及教育配套完善，我覺得畢業後長留香港，喺金融界搵份工未嘗不可。將來喺香港置業都唔錯。

我以前買過內地投資產品。喺一四年，我用咗5,000元人民幣買入內地第三方支付平台上嘅定息產品，雖然呢啲產品畀嘅利息唔高，但每日見自己戶口金額有進帳，真係好爽，所以買咗。之後覺得呢啲投資產品嘅透明度唔夠高，唔知啲息實際上喺邊度賺番嚟，所以其後冇再買喇。

彩兒：你真正涉足股壇係幾時？

楊：一五年三月開始炒股。股本嚟自零用錢及利是錢，有逾10萬元，不斷買出買入，到依家累賺逾兩萬元。

彩兒：當時投資目的係咩？

楊：因為資金少，只係純粹想用呢啲閒錢以小博大，冇定咩目標。我揀啲藍籌牛熊證，少炒個股。最近，我喺三月二十日買咗騰訊控股（00700）牛證，入市價450元，依家帳面蝕3,000元。我打算喺六月份到期前沽出。我對騰訊上半年表現仍有信心，因其手遊業務強勁，料股價會續炒上。

加息期外匯勢有炒作

楊：除騰訊牛證，之前買過恒指及滙豐控股（00005）牛熊證，因佢哋流動性強，方便炒即日鮮。況且買牛仔似賭博，趁短期波動賺錢唔錯。

Kitty：剩玩牛熊證呢啲高風險產品，驚唔驚心臟病發？

楊：我諗過玩埋外匯，因喺聯儲局加息時外匯波動啲，有唔少炒作機會。我準備放八成資金炒牛熊證，兩成資金炒外匯。若之後資金滾多啲，我會轉做長線價值型投資，七成資金買正股，兩成短炒利率，另外一成買避險資產。

Kitty：你有冇因人民幣升跌，而影響喺香港嘅消費意欲呢？

楊：我估美元會續升，人民幣會續跌，所以一早暢定錢交學費。

攻基金 靠芬佬搵叻股

鍾：拎住父母畀嘅幾十萬元嚟香港讀書。筆錢準備用嚟做生活費同交學費，但又唔想純擺喺銀行，所以決定攞去投資。

Kitty：萬一輸晒點算？

鍾：所以我只買穩陣資產。我先用廿幾萬元向中國建設銀行（00939）買入風險較低嘅中國國債，享定息逾3%。然後，再用咗2萬至3萬元買股票基金，包括納斯達克指數基金等。不過，早排見美股急插，驚多年升浪到頂，所以沽出納斯達克指數基金。目前只持有中國互聯網金融嘅基金，買入價逾5,000元人民幣。

彩兒：近日科網股持續受壓，騰訊股價喺四月四日曾跌穿400元，唔知幾時先會升見去年初476.6元高位。

睇好互聯網及區塊鏈

鍾：好彩基金分散投資，而且我投資本金唔多，所以暫時帳面只蝕幾十元。

Kitty：好多人嫌基金手續費貴啲，所以唔買佢。你點解專買基金？

鍾：我鍾意有基金經理幫吓眼揀股，揀中潛力股機會大好多，但又唔會太依賴佢哋，都會留意新聞，睇環球經濟，定期審視基金配置。

彩兒：三十歲前想賺到幾多錢？

鍾：我會想做到某程度嘅財務自由，但做唔到都唔會好介意，因我相信有知識就可創造更多財富。我會趁後生讀多啲書，同埋試吓唔同種類嘅投資策略。互聯網加埋區塊鏈嘅概念，我認為無得輸。

Bitcoin風險高 唔敢玩

彩兒：虛擬貨幣令不少寂寂無聞嘅投資者一夜間成為暴發戶，坐擁過億身家。你哋有冇炒埋一份？

（三位同學異口同聲話無。）

凌：唔知點衡量比特幣價值，所以目前仍摸唔透比特幣潛力。

楊：若你講高風險，比特幣真係數一數二。就算我相信比特幣係好嘅投資，但始終對佢安全度有保留，而且一個比特幣咁貴，暫時買唔落手。

鍾：比特幣背後嘅區塊鏈概念，我認為無得輸，但投資風險唔可以忽視。

Kitty 彩兒