絲絲講場：孫宏斌為樂視輸到「甩頭」

尋日業績發布會上，焦點自然集中喺孫宏斌身上，事關佢剛卸任樂視網（300104.SZ）董事長一職，又高調承認投資失敗。孫宏斌上半場並無回應提問，仲突然離場「上個洗手間」，返嚟後畫風突變，積極答問題之餘，仲爆出一堆「孫氏金句」。

擬成立文旅集團

今次孫總唔再激動，反添幾分幽默。舊年有投資者問佢點解唔用自己錢投資樂視，搞到孫總全日心情唔多靚。同一條問題今年再出現，佢今次就笑住話「自己沒有錢」。咁考慮退出呢？「投那麼多錢不可能退出」，仲開玩笑問有無人願意接盤，「可以打九折，真的有意可以再商量一下」，但價格要合理。

去年中期業績會孫總談及樂視時曾淚灑當場，尋日話「今天想要我哭是不可能的」，引得哄堂大笑。講笑還講笑，孫總之後一本正經說，無為投資樂視感到後悔，覺得生意有贏有輸，又話「人不怕做錯事」，「要經歷過痛苦、吃過虧才會成長。」

佢強調投資失敗都係轉型嘅代價，未有影響長遠投資方向，仍堅持投資文化旅遊項目，「科技創新我看不懂，消費升級就是『花錢』嘛！文化就是詩，旅遊就是遠方，所以我們投資的就是『詩和遠方』。」融創計劃今年成立文旅集團，主要負責營運去年收購嘅萬達文旅城及酒店。

末期息大增九成

融創行政總裁汪孟德補充，文旅項目住宅部分毛利率約30至40%，相信文旅業務未來3至5年會有很大收入及盈利貢獻，5至6年後可成長到支持集團發展。

融創截至去年底止盈利大增3.43倍至110.03億元，末期息大增逾九成至0.501元。今年度銷售目標訂為4,500億元。

余絲韻