重磅藍籌業績出一隻死一隻，大戶唔炒上走去炒落，昨日收市後仲有騰訊（00700）大股東出嚟批舊股，慌好友唔死。短線看官都係持盈保泰，忍忍手為妙。
美國聯儲局議息一如預期加息0.25厘，新主席鮑威爾首個會後記者會穩打穩紮，維持今年加息三次目標不變。昨日港股早市開高，但周三指數假突破後，炒鬼都學精咗唔跟上車，無幾耐個市已掉頭向下，臨尾市山泥傾瀉般愈跌愈深，最終跌343點收報31,071點。
問十個股民，恐怕九個識馬化騰而唔知騰訊大股東是何許人也！南非Naspers自○一年投資騰訊，一股都未沽過，昨日一出手，就搵三間美資行以價高者得方式，唔定折讓價批售1.9億股舊股，價值逾800億元，差不多等於騰訊過去五個交易日平均成交額的6倍。
點解揀呢個時候食胡，留畀鍾意陰謀論的股民去諗。不過，股王昨日浸浸落，吸引唔少捧場客築起血肉長城，接貨者真係多得佢唔少。正股322億元成交固然誇張，連埋窩輪同牛熊證約有435億元，差不多等於大市成交三成。
若騰訊今日裂口開低後，周四即市高低位459元及438.6元，亦變成中期密集蟹貨區，要返上去恐怕唔易。
另一隻要小心係港交所（00388）。近期走勢唔多對辦，陰陰乾由292.4元落番去264元，同三頂頸線255.2元愈行愈近。儘管李小加當正滬深港三個股市係親兄弟，但深交所為吸納騰訊及獨角獸回歸A股，猶如爭產肥皂劇一樣，打晒開口牌放佢哋走CDR捷徑上市。
萬一同股不同權上市最後雷聲大雨點小，舊年下半年由200元樓下起步炒上嚟的港交所，跌番升幅一半出街，落番250元樓下唔係無可能。股民不立危牆之下，想撈底不妨等埋幾間美國上市的中資科網企業高層露點口風至再諗。
古勝