絲絲講場：小加誘生科企上市 原來想有120歲命

話說尋日舉行生物科技峰會，為即將容許未有收入嘅生物科技公司來港上市而造勢。李小加開場時話，呢個時候提出吸引呢類公司來港上市，係「天時地利人和」，仲笑話自己其實仲有個「私心」！

小加話自己今年已56歲，按香港男性平均壽命係84歲計，即仲有28年命，佢希望生物科技嘅發展，可以畀佢冇病冇痛咁活到100歲甚至120歲。就算佢呢一代未能靠咁去得到100歲，亦望下一代可以搭上呢班「列車」。

冀跑贏美掛牌企業

峰會有超過六百幾人出席，場面墟冚，差唔多逼爆港交所「金融大會堂」，其中有六成係有意上市嘅生物科技公司，當中逾半更加係內地公司。好多生物科技公司老總好似「小粉絲」咁，走去同小加總裁影相「集郵」，仲話好有興趣來港上市，小加開心到飛起。

小加相信，有意來港上市嘅生物科技公司多數同內地有關係，無論產品或病人對象都喺內地，或公司有好多投資喺內地。小加嘅目標係未來喺香港上市嘅內地生物科技公司，無論係數量及市值，能超越美國納斯達克掛牌嘅企業。雖然呢個目標今年未必可達到，但會努力爭取。

新股通狂想可成真

四月底港交所就會推出有關新興公司上市制度規則嘅諮詢總結，小加估計首批上市嘅會係「同股不同權」及生物科技公司，預計暑假前將有新經濟公司能夠喺香港上市，秋季將有更多。下一步可能先會有海外上市公司來港第二上市。

講開目標，係人都知小加有好多「夢想」，其中一個係「新股通」。不過，日前就有上交所官員公開話個人認為「新股通」唔可行，甚至形容為「瘋狂的想法」。李小加就反駁話，無論係多年前上海成立股票交易所、到近年嘅滬深港通，以至近期嘅CDR，無一樣唔係由「瘋狂的想法」開始，當初甚至被認為喺法律上不可行，但結果最終都已實現。

收到！咁幾時有「新股通」推出時間表呀？呢樣，小加冇講喎。

余絲韻