Market Insight：國策股可作避風港

個市升又唔願多升，跌又跌唔得落，陰陽怪氣，睇嚟三萬同三萬一點是但一邊爆出後，個市先會變得明朗。中銀監下調內銀的撥備覆蓋率及貸款撥備率，內銀股曾經係威係勢，不過昨日統統開得高、收day low，短癮到極。多得股王騰訊（00700）炒高2%，收報443元見本周高位，撐住指數交足貨。

市場太樂觀唔係好事

消息話，美國總統「侵侵」最快會揀三八婦女節簽署指令，開始向進口鋼鐵及鋁材徵收懲罰性關稅。周三晚美股拗腰，港股甚至升凸的表現，到底魚缸當「侵侵」拋浪頭，抑或樂觀到認為對環球經濟影響唔大？深受華爾街愛戴兼賓架出身，屬於白宮幕僚中少數支持自由貿易的科恩都頂唔順「侵侵」要告老歸田，古勝有少少驚係第二個可能性稍高。

周三出的美國ADP私人就業職位數據勁過預期，十年期美國國債孳息衝上一周高位，華爾街加息預期再升溫，港匯腳軟拆息隨時追升，萬一受關稅牽連的美國盟友加拿大及歐盟又嚟鬥癲玩貿易報復，環球股市再嚟一次二月後再出現第二隻腳的風險，唔可完全抹殺。

息口敏感、出口及工業製造類股份都要避一避，惟有在國策股中尋找避風港。中國誓要同環境污染開戰，環保股應可在外圍市況風高浪急之下，不受影響。

亞洲最大垃圾發電營運商光大國際（00257）剛公布的一七年度業績表現唔錯，期內收入及毛利分別升43%及34.4%，純利35.1億元，按年增長26%，毛利率有所回落，主要是較低毛利率的環保設備，去年佔總收入比重有所增加。

光國業績增長具保證

光國繼續朝着綜合環保企業的方向進發，現時業務涉及能源、水務、環保科技及設備建造等多個範疇。截至去年底，手頭環保項目268個，當中竣工佔171個，遍布內地18個省及直轄市，當中54個屬新簽訂項目，料涉及總投資額197億元，是未來幾年業績增長來源。

公司高管表示，會配合「一帶一路」國策，增加海外環保建設投資，沿着新絲綢之路「走出去」，不過，海外項目現時僅佔總收入2%，外圍經濟波動的影響有限。

啱啱瑞信出報告給予光國跑贏大市評級，估光國一八年及一九年盈利為44.5億及55.5億元，相當於26.8%及24.7%的盈利年增長。依家只係15.4倍PE，既有國策支持，三幾年內增長有保證，估值唔貴，如果個市有閃失，拖埋佢股價返回12元樓下，可以諗諗佢。

古勝