絲絲講場：芒格講釣魚其實教投資
股神巴菲特喺投資界無人不識，但作為股神投資旗艦巴郡嘅黃金拍檔芒格，除咗喺一年一度嘅巴郡股東大會上，慣常會同股神齊齊列席之外，曝光率就較股神低好多。巴菲特日前與全球10所頂尖大學商學院學生交流時，被問及人工智能（AI）投資股市更勝人類時，佢就堅定咁回應學生，AI肯定贏唔到芒格！
由此可見，芒格喺巴菲特心目中嘅地位有幾高！講開又講，雖然已經年屆94歲高齡（巴菲特88歲），但芒格日前參加咗《Daily Journal》年會，喺兩小時嘅對談中，精神抖擻，無間斷地與現場觀眾以及與會嘉賓交流。
籲堅守兩大原則
對於投資，原來喺芒格睇嚟，跟釣魚係同一樣嘅道理，佢認為釣魚有兩個原則：一係喺有魚嘅地方釣魚，二係唔好忘記第一個原則。而且你要明白喺一啲地方，無論你係技術幾咁好嘅漁夫，都無可能釣到好多魚。
芒格又形容，如果你能夠活到很大年紀，總會獲得好多機遇，就算總共只有兩次機遇都好，你只要能夠抓住其中一次機遇就已經好好。
「舊橋賺錢 點解要改？」
講到時下美國科技股熱潮，如Alphabet、Facebook、Apple和亞馬遜嘅價值係咪已被高估，芒格只簡單一句：「我唔知，下一個問題。」
對於被問及能否使用AI為商業創造利益，芒格笑言呢個係好問題，但佢形容研究AI嘅人尚且唔知道答案，何況佢無研究過AI。但有一點肯定嘅係：「我唔確定AI係咪會帶來一場經濟革命，但我靠自己嘅常識已經生活得好好，從未想過進入AI領域。我可以喺海灘散步，執起金色嘅石頭，點解要換另一條路呢？」
余絲韻