三月業績高峰期未到，但五礦資源（01208）啲管理層似乎已經分身乏術。絲絲見到今日財經活動，竟然同日有兩單五礦資源嘅活動，一單係兩點半喺中環搞業績會，另一單三點喺九龍站一間酒店有場特別股東大會，半個鐘出席兩場活動，莫非班管理層識時空轉移？！
公關解釋話，兩場活動係唔同管理層嘅，業績會由CEO（行政總裁）加CFO（首席財務官）主持，股東會就由其他董事局成員同埋公司秘書負責喎，所以冇衝突嘅。
只不過咁嘅搞法，真係好少見，同業績期Book場難有關啩！
至於五礦資源其實尋晚已經公布咗全年業績，舊年轉賺差唔多1.5億美元（約11億港元），不過係冇派息嘅。
余絲韻