絲絲講場：林一鳴出新「輸」講投資失敗史
資深投資者林一鳴（Eddie）近日出新書，本書總結咗佢近三十年嘅投資經歷，部分都幾觸動股民嘅心。測市奇準嘅Eddie，喺股場上當然賺唔少，但佢亦唔介意喺書中分享一啲慘痛嘅投資經歷。
Eddie本新書《林一鳴的投資世界》提到，原來佢曾經喺一日內，將兩年來喺投資市場賺得嘅利潤，一鋪清袋兼輸凸，而當時佢正身處美麗嘅阿爾卑斯山！
跑阿爾卑斯山遇冧市
話說佢當年去瑞士參加馬拉松比賽，要由阿爾卑斯山山腳跑上近3,000米高位，點知驚覺恒指冧逾千點。一兩日後，恒指愈跌愈深，佢只好忍痛將早前喺香港開立嘅期權合約平倉，兩年拚搏賺到嘅，就咁化灰，仲畀人追孖展！嗰次佢得到教訓，就係出外地時唔好炒得太厲害。
Eddie直言自己乜都投資，股票、期權、物業外，連大豆、玉米等期貨，以至酒花，佢都有涉獵。
歷年版稅收入達百萬
講到做生意，原來十年前佢出過兩套叫《投資樂園》與《FQ 奇兵》嘅模擬投資Boardgame（桌上遊戲），雖然賣得唔錯，但就蝕咗幾十萬！點解？都係怪香港經營生意成本高囉。
計吓數，Eddie歷年喺香港寫過廿七本書，出咗咁多本書，咁佢賺定蝕？Eddie話，歷年來個人喺版稅收入大約有幾十萬到一百萬元。
唔講唔知，原來Eddie亦都係一間出版社嘅創辦股東之一。究竟係邊間？嗰間出版社都出版過唔少旅遊書，佢話旅遊書勁好賣，公司嘅盈利唔錯，諗起都開心咁話！
余絲韻