絲絲講場：機械人帶睇樓 經紀大鑊了！

簡化交易 慳一半佣

地產代理公司同一啲初創公司已經開始將人工智能（AI）融入工作場所，用機械人嚟代替地產經紀。啲美國公司實際已經做緊，包括地產經紀公司REX、物業管理公司Zenplace，以及初創公司VirtualAPT。

REX與Zenplace都係用機械人同客戶打交道。REX會喺放盤者嘅屋企裝置機器人來答客人問題及收集數據，Zenplace就用機械人來幫佢哋嘅人類經紀同啲客遠程通訊。

至於VirtualAPT就搞ChatBot（聊天機械人），仲會製作三維樓盤視頻，等啲人可以虛擬睇樓，唔使親身到場。

咁唔止簡化物業買賣過程，仲可以幫買家慳番啲畀代理嘅佣金，好似REX只收取成交總價值嘅2%作佣金，低過人類經紀收緊嘅5至6%佣。

佣收少咗，對啲代理公司有咩着數？搶多啲客兼慳番啲人工，條數雖則係咁計，但有人唔係咁睇。紐約房地產經紀公司Compass首席執行官Robert Reffkin就話：「我相信人類經紀對促成交易至關重要，而且永遠都係。」各位地產代理，你又點睇？

余絲韻