絲絲講場：邊隻藍籌最有女人味？
三•八婦女節就快到，非牟利組織社商賢匯發表《2018年度香港企業女性董事概況報告》，結果顯示有十隻藍籌公司董事會係全男班，而中國神華（01088）就最有「女人味」。
20%公司全男班董事
社商賢匯行政總裁魏余雪奕就話，香港喺性別多元化方面一定要加快步伐，以維持國際金融中心地位。咁又係，喺五十一間藍籌公司入面，有成十間公司董事會係全男班，真係令人失望。
其中煤氣（00003）、騰訊控股（00700）及中海油（00883）仲從來未有過女董事！而舊年「染藍」嘅舜宇光學（02382）、萬洲國際（00288）董事會都係全男班。
仲有嗰五間令人失望嘅係邊幾間？就係中國石油化工（00386）、中國移動（00941）、電能實業（00006）、華潤置地（01109）同中國旺旺（00151）囉！而呢五間公司其實舊年已經入圍「全男班董事會」，仲仍然未有改進！
神華女董事佔逾四成
點解話中國神華最有「女人味」？事關佢哋女董事比例有42.9%咁多！喺恒指成分企業女董事佔比最高。第二名係佔比33.3%嘅領展（00823），第三名係31.3%嘅恒生銀行（00011），而有十五家企業嘅女性董事比例多過或達20%。不過喺五十一間恒指企業入面，得恒生銀行嘅行政總裁由女性擔任咋。
余絲韻