孖妹S檔案：學睇業績報告揀靚股
港股正值業績期，孖妹梗係想趁機尋寶，可惜喺投資上都係被Shopping嘅壞習慣所拖累，成日花心乜都睇餐飽，所以揀股遲遲未落注。衫可以慢慢睇，業績期過咗揀唔到靚股，恐怕賺少轉。事不宜遲，等孖妹搵專家分析香港零售股、銀行股同地產股，教股友摘取業績報告嘅精華。
盧：興證國際證券客戶投資組副總裁 盧駿匡
譚：耀才證券研究部副經理 譚智樂
Kitty：古語有云，讀萬卷書，不如行萬里路。所以我先日日Shopping……
彩兒：你行咁多街，有冇領悟到啲咩？
Kitty：我平時Shopping根本係實地考察，依家再睇埋業績報告，雙劍合璧，我一定會搵到好股！
零售股：同店銷售增長率：受3因素影響 睇埋租金
彩兒：揀零售股究竟要睇啲咩財務數據？
盧：需留意銷售增長、產品盈利能力、經營效率、同店銷售增長率及資金回籠時間等。
Kitty：大部分Terms我都聽過，但同店銷售增長率……好似係以同一間銷售店開業至少一年為前提下，喺某段時期嘅銷售額，通常以月份、季度為時期，比較每年銷售額。若同店銷售增長未如理想時，股價通常會即跌。
彩兒：有三個影響同店銷售主因，包括自身因素、外圍環境及競爭對手。品牌吸引力減低，令客源減少；零售市道放緩，所有零售店遭殃；行內掀減價戰，銷售量增加未能抵銷劈價虧損。
Kitty：不過，銷售升幅幾勁都好，如果追唔到租金升幅都係冇用。另外，如果擴充咗舖面，同店銷售增長自然大啲。所以，我哋或者可以計計，究竟零售店舖每平方米可賺到幾多錢。
毛利率：反映市道及折扣運用
譚：零售店舖主要分服裝、化妝及珠寶。喺三類零售業務中，我各有一間心水公司，分別係I.T（00999）、莎莎國際（00178）及周大福（01929）。零售股對全球緊縮政策敏感度唔大，因此投資零售股唔錯，可以嘗試炒上落。
過去一年，股樓暢旺，零售業有復甦迹象，而且呢三間企業都將一啲經營欠佳嘅分店結業，同店銷售增長有望改善。
Kitty：係呀，舖頭見生意多咗，都唔憂做，唔再似以前畀咁多Discount。
譚：零售市道淡靜，當然要大打折扣搶生意，犧牲毛利率。企業依家見零售市道有反彈勢頭，仲唔減少減價活動，去谷高毛利率咩。
盧：不過，折扣促銷係咪有效，就要視乎收入增加帶來嘅額外毛利，能否抵銷毛利率下跌嘅影響。
存貨周期：愈短愈好 助資金流轉
Kitty：能夠入選孖妹最喜愛嘅時裝舖，就梗係賣Fast fashion o架啦！
盧：好正路。零售商雖然賣貨收錢快，但繳付貨款就相對慢。若去貨時間太長，流動資金就會被「責」住。要量度去貨速度，須睇存貨周期，即由貨物製造或購入至賣出所需時間。
彩兒：莎莎嘅存貨周期有改善，由一五年嘅124日，逐步遞減至一六年嘅113日，再到一七年中期嘅99日。
譚：另應留意零售商嘅自家品牌同代理品牌嘅比例，一般自家品牌佔比較多，毛利率會較高。
業務因素：首飾股受制原材料價
Kitty：金飾珠寶類別嘅零售股又點呢？
譚：售賣金飾珠寶嘅企業會受稀有金屬價格浮動影響，最驚價Chok，買入原材料嘅價格波動，令成本難控。幸近幾年黃金及鑽石價格唔係太Chok。
另要留意公司嘅金飾珠寶生意佔比。最近經濟好，財富效應帶動珠寶生意大升，珠寶毛利率比金飾毛利率高逾10%以上，令盈利大增。
銀行股：股本回報率（ROE）及淨息差：衡量盈利能力值參考
彩兒：銀行股業績有大堆比率，睇邊個先？
盧：先睇股本回報率（ROE）。
Kitty：ROE係用嚟衡量企業賺錢能力嘅財務比率，即年度純利除以平均股東權益。一七年，滙豐控股（00005）ROE為5.9%，大幅高於一六年嘅0.8%。管理層仲話，加息有助滙控嘅ROE達至中期目標10%添。究竟加息對銀行有幾好？
譚：你首先要知咩叫淨息差，淨息差即係資金借入與借出利率之間嘅差距。過去多年量化寬鬆（QE），喺低息環境下，淨息差會窄啲；但全球加息周期開始，估計淨息差會愈嚟愈闊，增加銀行盈利能力。
Kitty：除咗賺息，銀行仲有啲咩收入？
盧：例如淨手續費及佣金收入佔營業收入，用嚟量度銀行嘅非利息收入貢獻，喺淨利息收入受壓時，銀行會努力開拓呢方面嘅收入。
資本充足率（CAR）：倘太低恐礙貸款增長
盧：資本充足率（CAR）用嚟量度銀行的資本實力，不宜太低。若資本不足，不但會影響銀行未來嘅貸款能力及增長，更有可能需要募集資金，以符合銀行監管當局嘅要求。
彩兒：CAR將資本基礎除以風險加權資產。銀行嘅生意模式，就係將借番嚟嘅錢，轉借畀其他人以賺取息差，但借出去嘅錢都擔心有借無還，有信貸風險，資本充足率就可以監察呢個風險。
貸存比率及不良貸款率（NPL）：兩者處低水平較穩健
盧：貸存比率即貸款額與存款額的比率，不宜過高，否則影響銀行未來借貸能力。不良貸款率（NPL）係用嚟量度銀行嘅貸款質素，要愈低愈好。至於減值準備對不良貸款比率，係用嚟評估銀行對不良貸款撥備是否充足。中銀監要求內地銀行嘅撥備覆蓋率最少要有150%。
回購計劃：成事普遍料利好股價
Kitty：我爹哋媽咪以前一有錢就會買大笨象滙控！
譚：滙控仍係我最推介嘅銀行股，公司正進行架構重組，進度理想。市場憧憬滙控回購股份，故股價喺績前炒上。
彩兒：今次滙控未公布新一輪回購計劃詳情，股價倒跌。但股價跌係咪因業績表現略遜預期？
譚：跟回購關係較大，因滙控為國際大銀行，透明度高，大行平時會預估銀行稅前盈利及收入，同實際差距唔會太大。
市帳率（P/B）：評估價值 愈低愈抵買
Kitty：滙控績後股價累跌唔少，值唔值得低撈？
譚：滙控市帳率（P/B）略高過1。市帳率係將股價除以每股帳面值，反映股份係咪抵買，1係合理水平。
盧：兩面睇，銀行嘅基本面愈好，理論上估值可以愈高，即P/B愈高。
地產股：物業銷售利潤：貨如輪轉勢有利套現
Kitty：香港地產商去年賣樓成績佳，業績實靚仔！
譚：地產商賣咗咩新盤，大家瞭如指掌，故業績入面所列嘅銷售利潤照道理冇咩驚喜，除非樓價急升，銷售火熱。我睇業績，最留意土儲。
盧：物業銷售利潤上，利潤率雖愈高愈好，但留心銷售速度，最好貨如輪轉，減少資金被「責」住機會。淨租金收入理論上可提供穩定現金流。至於淨負債比率愈低愈好，代表財務健康。
土地儲備：價格必影響競爭優勢
盧：另要留意新增土地資源平唔平，因佢非常影響公司長遠競爭優勢。
彩兒：地政總署去年完成幾宗大規模農地轉換嘅補地價程序，政府又探討以私人土地或農地作公私營合作嘅可行性，以增加市場整體房屋供應。
譚：擁優質農地儲備嘅發展商，將來可睇高一線，目前宜觀望。
帳面資產淨值（Book NAV）：見高折讓 宜趁機低撈
彩兒：想買入股份可睇咩數據？
盧：留意每股帳面資產淨值（Book NAV）較股價嘅折讓水平，有高折讓或係低撈好時機。
Kitty：仲有咩盲點要留意？
盧：留心管理層過去操守及企業管治情況。例如，經常不合理地低價配股、認購股權，喺現金充裕情況下卻拒絕派息，以至關連交易等。另宜進行同業比較，一般可集中喺營運效率、住宅定價能力等方面，衡量企業競爭能力。
彩兒、Kitty
若有料報畀彩兒同Kitty或有嘢問，可電郵money.biz@on.cc