Market Insight：金軟受惠影子股效應

港股失守10天、20天及50天線，上周五在美股拖累下，再插460點收報30,583點，平心而論，中國鋼鐵及鋁材佔美國進口量唔到百分之三，反而加拿大及歐盟等真正受害國，反彈極大，預料報復行動不日上映。君可見德股DAX已經率先跌穿二月環球大冧市低位12,003點，上周五低見11,913點，港股仲未返回29,129點今浪低位，都算大話夾好彩。

現階段宜持盈保泰

今浪貿易戰打唔打得成？真係兩睇，「侵侵」失驚無神打出貿易戰怪章，美其名是兌現選舉承諾，人人都知美國平均薪酬唔低，工會又惡，美國鋼鐵及鋁產業有幾多空間大展拳腳，大家有眼睇，反而依靠進口鋼鐵及鋁材料的航空、製車、飲品食品加工等，佔經濟比重大得多，進口關稅一升必然陣腳大亂。利字當前，巨企必然對華府施壓。

況且「侵侵」最鍾意將股市升勢同自己政績掛鈎，在美股大玩高台跳水之下，仲點可以自圓其說，收回成命機會唔能夠完全抹殺。不過，投資市場最驚估估吓，短期唔明朗環境，加上環球股市驚收水可能已經見了中短期高位，現時最適宜減吓磅，持盈保泰，等恐慌拋售出現先再買貨的心態應對。

上周五港股全日波幅唔夠200點，反而夜期坐過山車一樣，一度失守三萬落到29,995點，收報30,283點比香港收市跌251點，由於較美股早收市，夜期反映唔到華爾街尾市反彈，相信今朝港股好大機會在30,400至30,600點之間開出。

港交所（00388）力谷同股不同權，相信小米會係最早一批來港上市公司之一。街外傳的小米估值真係海鮮價一樣，聽番嚟介乎600億至2,000億美元，相當於4,680億至1.56萬億港元。若是前者，小米已大隻過4,155億市值的藍籌中銀香港（02388），若是上限的話，市值更殺入港股六強，緊隨騰訊（00700）、工行（01398）、建行（00939）、中石油（00857）及滙豐控股（00005）後。

小米未上市先得益

有隻巨型到咁交關的姊妹公司上市，大股東雷軍另一上市公司金山軟件（03888），上周逆市攀升，由25元邊兩個戰步衝過上28元，大有挑戰年初高位29.25元之氣勢。金軟早前發盈喜，因旗下獵豹授權事項，會出現被視為未經審溢利20億元人仔。雖然這純粹係會計項目，但依家炒股深究的人少，睇標題的人多，況且金軟核心業務收益開始復甦，當佢做小米影子股咁細細地玩吓，話唔定仲有意外收穫。

古勝