孖妹S檔案：睇透恐慌指數Chok市唔使驚

譚：中環資產投資行政總裁 譚新強

潘：亞達盟環球期貨副總裁 潘志偉

VIX產品 含槓桿成分 睇清玩法

Kitty：我個心最近跳得好快！

彩兒：等我幫你把吓脈。嘩！你最近係咪壓力太大？

Kitty：可能因為小股災過後仲未驚完。

彩兒：咁你要留意吓喇，可大可小。我估你心電圖條線可能都似VIX指數一樣咁Chok！

Kitty：玩VIX相關產品嘅散戶咪被Chok到暈？

VIX指數與標指近月走勢	亞達盟環球期貨潘志偉稱，VIX期貨比較多投資者買賣。	中環資產投資譚新強建議，密切留意全球最大對沖基金Bridgewater的投資動向。

譚：喺最近嘅小股災，VIX爆咗上去，VIX指數二月六日飆至年內最高50.3，恒指單日跌1,649點。你可能會話沽VIX嘅人慘，唔少VIX ETN（交易所買賣票據）輸超過九成，甚至話佢哋係傻仔，贏粒糖，輸間廠，收咗Premium（期權金），咁大Liability（責任）。

不過，如果你話唔沽，轉買就得，咁你又錯，例如喺美國上市嘅VIX期貨交易所買賣基金VIXY由一一年十月每股12,674美元，跌到依家約30美元。如果你係長期持有呢個產品，仲慘過沽VIX嘅人。

理論複雜 業餘忌沾手

Kitty：聽到我一額汗，可唔可以再解釋吓？

譚：解釋前，記住，香港業餘投資者，唔好沾手！因為當中理論非常複雜，而且VIX相關產品，包括VIX期貨，以至XIV反向產品，都含有槓桿成分。

Kitty：冇問題，我哋一向食慣花生。

譚：VIX指數稱為恐慌指數，由芝加哥期權交易所推出，係標指於未來三十天的波動預期（隱含波動率）。假如VIX指數係15，表示預期年波動率為15%，即三十天後，標指有68%的機會最多漲跌4.33%以內。

佢反映投資者願意畀幾多成本對沖自己嘅投資風險，亦反映投資者對後市恐慌程度。指數愈高，投資者愈不安。

彩兒：通常喺跌市，VIX指數會不斷升高；喺升市，VIX指數則會下跌。睇番○○至一二年嘅歷史數據，有逾八成時間，標指同VIX指數都係反向走，因跌市時，不少投資者會買認沽期權對沖投資組合風險，令嗰啲期權嘅隱含波動率抽升，所以VIX指數亦抽升。惟升市時，又冇逼切性要買認購期權噃。

期貨普及 入場費10萬

Kitty：聽落幾易捉路，介紹啲VIX相關產品嚟聽吓？

彩兒：你諗得太簡單，VIX相關產品類別多元化，包括股、匯、商品及固定收益等，所以要了解清楚遊戲規則及風險先至好玩。

潘：炒VIX喺香港真係好另類。比較多人玩嘅係VIX期貨，佢哋喺大事件發生前，估後市會跌；又或者佢哋揸住股票，特別係美股，想對沖股市下行風險等。不過，股市上升及VIX下跌係同步，假如你後知後覺就太遲。然而，VIX期貨合約價格為每點1,000美元，入場費逾13,200美元（約10.2萬港元）。

設有反向追蹤VIX產品

彩兒：聽講仲有反向產品，例如XIV同SVXY都係沽空VIX。XIV係反向追蹤VIX嘅交易所買賣票據（ETN），屬於公司債，有信用風險，如果發行商瑞信破產，XIV嘅投資就會變得一文不值。SVXY係ProShares發行嘅VIX短期期貨ETF，則沒有信用風險。

譚：要明白隱含波動性，就要由「Black-Scholes期權定價模型」講起，佢係一個為期權定價嘅數學模型。模型源自兩位美國學者，包括哈佛商學院教授羅伯特‧默頓（Robert Merton）及史丹福大學教授邁倫‧斯科爾斯（Myron Scholes），佢哋仲贏得第二十九屆諾貝爾經濟學獎。

Kitty：難怪你話呢啲產品唔簡單。

譚：Black-Scholes期權定價模型有個大膽假設，就係波動率係一個常數，但實際上有多個人為因素，所以Black-Scholes計算出嘅期權金與真實嘅有大差別。

其後，有人發現VIX會因應唔同嘅行使價及時間而轉變，所以開始有人研究VIX變動，發現佢哋都傾向均值回歸（Mean-reverting），價格圍繞其平均值上下波動，就好似息率，唔會一直上升而唔下跌。不過，究竟VIX線係打橫、向上還是向下，真係難以估計。能夠適時進出市場而長期賺錢嘅人極之罕有。

彩兒：有效市場（Efficient market）嘅講法係咪可以準確計算VIX？

譚：Efficient market指市場上證券價格皆能正確、即時及充分地反映所有訊息，標指每年平均波幅唔應該高過4.5%。然而，行為經濟學推翻咗個理論，現實中市場嘅波動率係比有效市場嘅更為波動。

因此，炒VIX就似吞劍、玩火把，唔適合兒童或業餘投資者。

影響力巨 觸發策略沽貨釀跌市

彩兒：VIX指數俗稱「恐慌指數」，VIX可以帶嚟咩災難性危機？

譚：又未係災難性，佢同全球經濟出現嘅系統性危機唔同，VIX可以牽動市場小風波，當然唔可以忽視。指數上升，或觸發趨勢型商品交易顧問策略（CTA）、風險平價（Risk Parity）及變額保險（Variable Annuity）策略沽貨，繼而迎來跌市，然後指數再升，造成惡性循環，令股市下跌速度更快。

Kitty：呢三個策略係咩嚟？

譚：CTA策略跟技術分析、炒賣期貨差唔多，但市大跌，Sell得勁咗，咁波幅再大啲，又再Sell多啲。至於Risk Parity投資策略，原本理論基礎係因債券同股票嘅關連系數為負數（Negative correlation），而要令債券同股票嘅波動性相似，投資風險相近，就加大咗債券部分嘅槓桿，直至債券及股票對組合嘅風險貢獻相若。不過，早前因美國非農就業數據理想，意味聯儲局加快加息及縮表步伐，出現小股災，竟出現股債一齊跌嘅反常現象，股債嘅關連系數變咗正數，Risk Parity組合肥佬，輸死喇。

Kitty：係噃！預期債息上升，投資者或者會沽債，等債息再升番先買。加息就似收水，投資者或會減少買股。

後市部署 吼實對沖大鱷Bridgewater

彩兒：仲有冇咩要特別注意？

譚：全球最大對沖基金橋水（Bridgewater）聲稱，自己沽咗價值220億美元（約1,716億港元）嘅歐洲股票，佢平時作風低調，今次離奇大聲講出嚟，我心感不妙，唔知佢係咪真係睇淡歐洲股市，抑或佢嘅投資組合內歐股長倉比例依然比短倉多。所以，我建議投資者密切留意佢有咩動靜，佢身為全球最大對沖基金，有咩三長兩短，我哋都好難唔被拖累。

彩兒：提防小股災，你幫客人投資時有冇特別小心？

譚：我哋都有採取風險管理，縮細及調動倉位，增加現金及債券。如果揸住某啲股票，長期睇好，但又驚股票有短期波動，我哋會用期貨對沖。但唔一定買認沽期權，可以沽認購期權。

Kitty：投資VIX呢？

譚：暫時唔玩呢樣住。

彩兒 Kitty