Market Insight：醫藥股今年最有景

聯儲局紀要對美國經濟展望樂觀，又再觸動通脹復燃的神經，持續高位徘徊的十年期美債孳息，周三晚再升上2.94厘的今浪高位。華爾街立即驚到有得震無得瞓，一度收復的道指50天線最後交易時段得而復失，道指埋單跌166點，近兩星期的反彈似乎告一段落。

美國利率期貨預示，三月二十一日的議息，加息已經無乜懸念，比較意外是一成機會率一口氣加夠半厘，難怪股市反應咁大。其實好多股民對點解債息升，股市緊張成咁只一知半解。債息升意味市場融資成本上升，必然引發市場短暫的去槓桿，其次是投資市場從來認定美國唔會破產，國債再高只要keep住印銀紙就可以搞掂。

憂觸發芬佬大舉沽貨

市場的潛規則：十年期美國國債是無風險投資回報的基準，粗淺咁講，如果股市回報要求高於美債息1厘，債息由2厘上到3厘，咁基金在股市的要求回報也要由3厘上到4厘，亦即是要減磅沽貨，等回報率去到目標水平先再入市。

對於今浪十年期美債息的臨界點，到底甚麼水平方會觸發大規模的基金沽貨離場仍眾說紛紜。「新債王」岡拉克認為條紅線在3厘，亦有唔少名嘴估計介乎3至3.2厘。最樂觀的，認為升穿3厘金融海嘯後都唔係未試過，一四年初曾升穿3厘，當時道指在個多月後由高位回落7.5%。今浪唔等3厘，道指已由26,657點殺落23,183點，最多跌咗13%。

債息唔落 股市難安寢

一本通書唔可以睇到老，一四年道指在16,000點水平，美企市盈率18倍，早前高位估值近24倍。加上當年歐洲及日本央行仲擴表放水之中，相反依家美歐日中都話要收回寬鬆貨幣措施，回歸中性。總之一日唔見長債息有較大幅度回落，企住2.85至3厘之間上落，基金經理依舊寢食難安。各股友即使手痕都係控制注碼為宜，暫時唔係賭大錢的理想時機。

講番股事，昨日古勝提過蘋果公司居然去搵鈷礦商洽談直接供貨，環球少數鈷礦玩家之一的洛陽鉬業（03993）可以睇吓，點知即時逆市升到爆廠，創逾十年新高，升8.3%收報6.36元。

新正頭未過，在下百無禁忌，講講今年估計好大機會唔理市況起伏都能跑出的必然是醫藥類股份。中國人口老化，中產冒起，持續刺激對藥品消費，去年中國已成為全球第二大藥品消費國。去年中央推動醫藥創新發展，加快新藥審批，達到消費升級目標。

聯邦制藥搭轉順風車

會唔會有朝一日，國產藥廠科研及藥品創新技術挑戰到美國輝瑞、瑞士諾華等知名大廠的地位，有待時間證明，既然國策大方向力撐，點都可以睇多兩眼。不過，舊年走得太前的龍頭股好似石藥集團（01093）及中國生物製藥（01177）都有抖氣迹象，反而舊年無乜鑊氣，但係都幾肯定全年業績可以虧轉盈的聯邦制藥（03933），昨日啱啱大成交破位，可以搭轉順風車。

古勝