有星級經理坐鎮嘅基金，投資回報可能有保證，但最近有人提出揀基金新指標，就係「以貌取人」，皆因有研究話基金經理塊臉愈闊，愈信唔過。
最近有份美國同新加坡大學嘅聯合研究報告顯示，臉闊高比（闊度：眉至上唇高度）為2.1：1嘅基金經理，比起臉闊高比1.57：1嗰啲，每年投資表現低5.8%！研究結果係基於九四年至一五年間3,868份樣本統計所得。
呢個研究話，基金經理塊臉愈闊，交易愈頻繁，愈博高風險投資，亦愈唔願止蝕。理由可能同男性賀爾蒙有關，因為體內睾丸酮較高者通常塊臉都會闊啲喎，你又信唔信呢？
余絲韻