Market Insight：金屬原料股奇貨可居

係1,592點！所指是二月十三日之後，港股通落閘北水暫停以來，港股在短短四個半交易日恒指所累積升幅。近半年個個講到大媽在香港魚缸呼風喚雨，查實北水不過佔港股交易量12至16%左右，偏偏香港股民就要將股市升跌的指揮棒交畀佢哋，係咪妄自菲薄，大家自行判斷。

昨日港股叻到曉飛，奀豬成交恒指曾挾逾六百點，無非賭今日北水重開落嚟接火棒，會唔會係一廂情願？好快有答案。

自一月底，美國通脹預期升溫，引發長息抽升觸發環球股債市冚倉，道指由26,616點歷史新高殺落23,360點，反彈去到25,432點，收復咗跌幅63.6%。

集體散水風險未解除

相比同期，恒指由低位29,129點反彈，只係追番成個跌浪的53.9%，唔算得上勁，過去幾個交易日靠千零億成交，期指大戶阻力唔大乘機博亂罷了。

古勝認為，要分辦真見底抑或純技術反彈，可以留意一個重要分水嶺。美股跌浪始於二月二日，當日道指跌665點被稱為華爾街黑色星期五。港股二月五日的周一開市，恒指最多跌近900點到收市收窄到356點，完全多得散戶義無反顧，加埋當日過百億元人仔北水淨流入撐住。之後發生乜事大家記憶猶新，道指當晚再隊過千點，第二日恒指一瀉如注，勁跌1,649點創史上最大點數跌幅。

二月五日通街清兵，撈貨的低位31,712點，假如能順利突破，意味大家鬆綁最後無事，後市睇三萬二甚至更高唔係問題，但假如可望而不可及，即表示上面又壓多一批蟹貨，想指數短期舊地重遊高位睇怕唔易。要知十年期美債息仲企住3厘警戒線邊緣，再引發股市第二波集體散水的風險仲未解除。

全世界都話要發展電動車，歐洲已經制訂石化能源汽車在二○二○至四○年間退場的目標，中國亦計劃逐步以新能源車取替傳統汽車，以壓抑排放污染。不過，製造充電池金屬長期供不應求，像主要原材料之一的鈷，去年中國產出增長逾五成，一樣奇貨可居，價格有升無跌。

洛陽鉬業要望多兩眼

有報道指，蘋果公司正洽商直接同鈷礦商訂長期供貨合約，以穩定充電池原料的供應，電子消費品牌居然要直接向礦場落單，跳過電池供應商，可以想到流動電話等器材佔用全球鈷金屬四分之一產量，加埋未來電動車雨後春筍盤湧現，市場必然更加吃緊。

蘋果公司的舉動，猶如飲牛奶要自己養牛，喺搵到其他替代技術之前，恐怕搶鈷的情況都會持續。依家全世界鈷礦集中幾個大玩家手中，可惜嘉能可啱啱退咗場，本地掛牌仲有一隻洛陽鉬業（03993），不妨花啲時間研究研究。

古勝