絲絲講場：花旗破格帶機械人拜年
尋日初五啟市，花旗銀行零售銀行業務主管林智剛除咗聯同財神到花旗銀行中環會德豐分行向員工大派開年利是外，今年仲突破傳統，帶埋「新同事」智能機械人Pepper到分行一齊向客戶拜年。
Pepper唔單止專登披番件應節紅噹噹唐裝衫，仲好有創意咁，入面襯件西式禮服小背心同煲呔添！
Pepper進駐分行湊客
新一年，Pepper會進駐指定嘅花旗分行與客戶互動，會向客戶解釋多元化理財同訂立理財目標嘅重要性，仲會分享人工智能發展嘅資訊。
想見識吓呢位「新員工」？去佢哋會德豐分行、銅鑼灣分行、旺角分行及尖沙咀彌敦道分行就會見到佢。
余絲韻