Market Insight：滙控再發威多得大媽

如今大家最關心的，是港股調整是否一步到位，抑或反彈後會再尋底。古勝看法係，農曆新年前港股暫無力重上高位，如果32,200點水平得而復失，則調整有機會向下試30,800至31,000點始告喘定。故短線博反彈者見好要收。若然對後市展望仍感樂觀，中線坐貨有信心經得起震動，都要做定兩手準備，嚴控持倉槓桿下行事，且集中在具流通量的大價股，確保有逃生門，以免大失預算。

國指改革長遠利好

恒指公司今日公布季檢結果，國指將納入十隻紅籌或民企股，新納入的個股權重上限最初為2%，並於一年內分五個階段上調至最高10%。大熱的國指新貴包括騰訊（00700）、中國移動（00941）、中海油（00883）、聯通（00762）及華潤置地（01109）等。若然騰訊獲納入國指，相信會大大提升國指的市場關注度。部分睇唔通外圍尤其係美市走向，可能轉移集中火力攻中國股票，相信待三月季檢生效後，會多咗資金投資國指相關投資產品。

講開又講，昨日跌市，能夠收復逾半失地，相信與北水接貨有一定關係。滬深的港股通使用額度合共逾102億元人仔，顯見北水撈貨真係坐言起行。工商銀行（01398）、建設銀行（00939）及農業銀行（01288）股價均以倒升收場，北水的助力不少。

到底今年中國故事係咪真有下文？睇昨日A股竟然可以倒升收場，似乎又真係唔多想落。再睇三月內銀股將陸續公布的業績應該唔會差，加上六月A股入摩，老實講早年大手揸內銀股的外資策略股東，要沽的經已沽得七七八八，橫睇豎睇，內銀股又真係唔使睇得太過悲觀。

鋰電池股不妨儲貨

數據顯示，除了內銀之外，昨日北水最主力接貨的還包括騰訊及滙豐控股（00005），其中滙控獲南下資金的淨買入金額逾15億元，佔滙控成交額的39%。大媽們咁睇好滙控，除非後市差到冇朋友，否則年內指數再創新高的話，相信滙控會是升市主力之一。

主營產銷新能源動力電池系統及儲能系統的內地電池巨頭寧德時代已啟動上市計劃，估計擬於內地創業板集資逾百億元人民幣。國策致力拓展新能源汽車產業發展毋庸置疑，新能源汽車除了整車部分外，電池亦為產業鏈的核心。隨着行業龍頭在A股上市，相信可享有高估值之餘，亦可帶挈整體行業估值水平，所以今年呢一個仲未大炒的板塊，值得投資者關注，不妨小注吸納做倉底，等板塊氣氛起動再追入加注。

古勝