絲絲講場：里昂測港股狗年Chok住上

中信里昂分析師蘇敬培（Alec）就同大家解釋背後嘅玄機。

消費醫療板塊料當旺

佢話我哋依家處於一個甲子裏面嘅土周期，二○一七年係「土雞」年，二○一八年就係「土狗」年，五行屬木嘅「四綠星」會入嚟主宰二○一八年「土狗」年，所以同樣屬木嘅消費股同醫療股，全年表現會跑贏其他板塊。

佢又話，第一季木嘅元素會好多，所以恒指呈強，二月廿八號（星期三）更加係「大吉日」！

不過所謂「木生火」，進入第二季火元素起勢就要小心嘞，因為恒指本身屬金，「火剋金」自然就冇運行，大市會出現調整，但好在有建築同資源股喺春季至夏季中興盛可以畀大家炒吓。

火元素第三季就會減退，令恒指喺七月見底，七至八月就係買貨嘅好時機，水嘅元素到時會發力，「水生木」下恒指又會生猛番，二○一八年全年依然會錄正回報！

二○一八年頭啲內銀升到嘭嘭聲，但Alec話，今年缺乏金嘅元素，擺明屬金嘅金融股自然會跑輸大市，尤其是第二季「火剋金」嗰段期間，同樣屬金嘅車股同機械設備股今年表現亦會比較淡。

反而火嘅元素今年會好強，屬火嘅科網、科技、電力同電訊都會做得幾好。

另外，中信里昂嘅風水指數傳統都談及地產，分析師陳舒婷（Sally）就話，香港嘅正中位好似尖沙咀、旺角同紅磡，以及有愛情之星坐鎮嘅西北，二○一八年都有好好嘅能量，想行運就要保持場所空氣流通。

7月16恐股市大凶日

至於正西同正北又點？Sally話呢兩個方位就會運滯啲，正西要啲尖銳晶石、正北就要啲金或者銅嘅嘢抵銷唔好嘅氣場，將屋企同寫字樓分成九格，一樣可以套用依個理論！

啊係，今年股市嘅「大凶日」係邊日？答案係七月十六日，星期一。

余絲韻