學識呢15招返工最醒神

想有運行，其實絕對可以靠自己。以下返工醒神15招，經科學證明，可提升自己工作效率，唔使「死做爛做」，兼可準時收工，做個職場大贏家。

建立時間跟蹤紀錄，可確實知道自己達成每樣工作用咗幾耐，亦可得知自己浪費咗幾多時間。

人類嘅專注力有周期，當長時間工作，靈敏度會下降。唔好睇小短暫休息嘅威力，能夠畀你快速「叉電」。

你冇睇錯！有外國研究證明，午睡20分鐘助你恢復專注力及精神。外國有啲科技企業仲特意為員工設置睡眠室，提高員工嘅工作效率。

自然光對工作嘅好處經常被忽視。適量嘅光照有助改善心情，能夠接觸到自然光嘅員工更健康，工作表現較佳。

「工欲善其事，必先利其器」。就算你再「快手」，但若然配上「龜速」嘅網絡，想快都難。咁就係時候同公司IT部門傾傾。

有冇發現，每次親親大自然後，都感到壓力得以釋放？大自然確實有令人愉快嘅魔力，若Office窗口望唔到自然景觀，大可喺枱頭擺放植物，閒時望望鬆一鬆。美國科技公司微軟為激發員工創意，就喺美國華盛頓州總部建立戶外「樹屋」，作為休憩地方。

每晚瞓覺前，預先計劃好第二日嘅工作安排，能夠令你好好善用時間，更易達成目標。

工作佔人生三分之一嘅時間，只有喺工作中搵到快樂，先可以日日擁有好心情。首先，盡可能搵份自己感興趣嘅工，否則亦可借助運動、冥想同搵美食咁，等自己活得自在。

活喺資訊爆炸年代，大家每天面對無窮無盡資訊，仲總係壞消息居多，睇得多心情難免受影響。為免影響「好心情」，應要學會避開吸取過多負面嘅資訊，多睇勵志書，為自己加添快樂元素。

工作壓力過大，想要放鬆，相約朋友開餐絕對係好主意！同Friend吹水可以抒發心中鬱結，相信當你需要聆聽者時，好朋友係唔會托手(月爭)嘅。

睇YouTube竟然有益工作？有大學研究指，睇YouTube啲搞笑片，工作效率會提高9%！點解？原因係睇片能夠引人笑，閒時睇啲開心好笑嘢，對工作亦有幫助。

適當溫度可以增加工作效率，過熱或過冷會影響員工表現，甚至令佢哋病。芬蘭研究發現，員工喺攝氏21至22度嘅產能最高。該研究又指，過冷嘅環境可導致每名員工每小時嘅勞動成本增加10%，校啱合適溫度後，員工打字出錯機會即減少逾四成。

加拿大麥吉爾大學行為神經學教授Daniel Levitin認為，大腦進行多項任務嘅工作時，並唔能夠一次同時做一個以上嘅任務，而係喺不同任務之間切換，頻繁嘅切換會令人疲累。為免一心多用拖低效率增加出錯機會，做嘢都係專注一項還一項比較好。

工作能力強嘅人，能夠善於營造良好嘅工作環境。有唔少研究顯示，雜亂嘅工作枱會減低工作效率，分散大腦專注力。

噪音會讓人感到煩躁、難以專注，想更加集中可以聽聽音樂，當中以樂器演奏效果最好。