絲絲講場：耶倫歡送會超墟冚
聯儲局主席耶倫冇畀美國總統特朗普睇中提名連任，尋日係佢最後一個工作天，不過一眾同事禮拜四就同佢開咗個盛大Farewell Party（歡送會），當佢喺聯儲局總部Eccles大樓中庭出現一刻，全場掌聲雷動，喺呢個平日十分嚴肅嘅工作環境非常罕見，算係留番個美好回憶啦。
鮑威爾反衫領致敬
耶倫雖然係聯儲局首位女主席，但表現絕對唔輸蝕畀其他男掌舵人，周一將宣誓接棒嘅鮑威爾就讚揚耶倫係歷史上最具資格嘅聯儲局主席。
鮑威爾仲將自己嘅西裝領豎起，用呢個耶倫着衫習慣向佢致敬，而聯儲局之後發布呢張相，職員就喺社交網絡以#PopYourCollar瘋傳。
的確，鮑威爾呢番話絕對唔係亂講，喺耶倫任內，美國失業率由上任時6.7%降至依家4.1%，數以百萬計美國人得以重返工作崗位。
至於耶倫喺歡送會上就娓娓道來點樣喺聯儲局餐廳內邂逅佢老公──諾貝爾經濟獎得主阿克洛夫。
最後，耶倫除咗同一眾同事影相之外，更獲贈總部大樓外面曾經掛過嘅聯儲局旗幟，帶返屋企留為紀念。
余絲韻