絲絲講場：滙豐歐智華攞獎晒戰績
滙豐控股（00005）集團行政總裁歐智華離別在即，獲FinanceAsia頒咗個「卓越成就獎」，佢乘機提早總結自己任內做咗嘅重組行動，係集團153年來最大規模。
不過，歐智華未能親身領獎，派咗大中華區行政總裁黃碧娟做代表，仲幫佢讀出獲獎感言，話做舵手7年，至今嘅重組係集團史上最勁，賣出或者關閉咗106項業務，期間股東回報有45%，累計派咗超過600億美元（折合4,680億港元）股息添！
黃碧娟「冒險」代領
其實呢個獎過去都有好多重量級財金人物拎過，包括人民銀行副行長兼外匯局局長潘功勝。滙控近年亦都係FinanceAsia大贏家，曾奪最佳銀行、最佳債券銀行等獎項。
另外，歐智華「臨別贈言」仲特別多謝香港，成為佢嘅發展地方，覺得香港、亞洲同銀行業，都迎接緊最美好嘅日子！
小插曲係呢個頒獎禮近日喺灣仔舉行，好彩無受「炸彈事件」影響，黃碧娟代領呢個獎，都咪話唔緊張，總算有驚無險！
余絲韻