絲絲講場：貝索斯親身出鏡谷Alexa

眾星拱照語音助手

呢個超豪花費嘅廣告，自然要玩啲花臣啦！首先，條廣告片入面，先係有個用家邊刷牙邊問Alexa當日天氣點，Alexa想答時忽然咳起上嚟，跟住仲失埋聲！然後就出現「Alexa今晨失聲」嘅新聞報道。

呢個時候，憂心忡忡嘅貝索斯踩入Amazon總部，問：「點可能嘅事？！」佢下屬即刻話：「我哋已經準備咗替代品，就等你一聲令下！」

原來所謂替代品就係請來幾位歌影視名人，例如美國新生代饒舌女歌手Cardi B、「地獄廚神」Gordon Ramsay，仲有澳洲喜劇女演員，拍過三集《完美巨聲幫》電影嘅肥妹仔Rebel Wilson，以及奧斯卡影帝、飾演《沉默的羔羊》電影裏頭食人嗰位Hannibal Lecter嘅安東尼鶴健士。

佢哋四位星級代替品，取代Alexa呢位語音助手，真人回答用家提問，奈何都係問非所答。廣告無疑係惹笑，但背後真正隱藏嘅寓意又係乜呢？肯定係要顯示Alexa地位無可代替！

大家如果眼利嘅話，有無留意到四位巨星化身Alexa回答用家提問嗰陣，都係戴着一個會發出藍光嘅耳筒呢？其實呢個咪係Amazon專利嘅新產品，而且Echo亦已步入新市場，可以與智能手錶及耳筒連接，聽講Alexa嘅語音仲可以客制化，配對唔同口音嘅美國人添。

如果大家想先睹為快，YouTube已經有得睇足本廣告。

余絲韻