孖妹S檔案：U界6大炒神測市準過人？

呢個禮拜又再天寒地凍，但炒房就熱辣辣！港股近排連續六日破頂，投資者資產Chok爆，鬼咁刺激，炒房仲唔升溫？上個禮拜，仲畀孖妹搵到條新嘅發熱線，就係一班隨時成為明日炒神嘅大學生，見到佢哋咁精靈，孖妹都畀佢哋電一電！

U界6大炒神測市準過人?

Kitty：Kenneth，快啲介紹啲投資新星嚟識吓。

K：No Problem！我估你又係問佢哋股市嘢啦？

Kitty：咩都被你看透。哈哈哈......

P：科大經濟及財務學四年級生 Peter

K：科大工商管理四年級生 Kenneth

R：城大電子工程學四年級生 Ricky

T：中大國際貿易與中國企業四年級生 Teresa

KK：中大醫學院五年級醫科生 KK

H：樹仁大學工商管理四年級生 Harvey

科大 Peter：股災難現恒指上40000

P：恒指狂破歷史高位，但都唔算太高，因有盈利支持，再炒上40,000點一啲都唔奇！我唔覺得一八年有股災，故不斷入市買中國新經濟股，如騰訊控股（00700），佢一路升，我一路追。

彩兒：騰訊升咗咁多，你唔驚一跌會輸得好甘咩？

P：騰訊前途無可限量，WeChat變成必需品，喺大陸農村買菜、買腸粉，都用緊微信支付。我同啲朋友都鍾意玩騰訊旗下手遊，如王者榮耀！當然經濟差嗰時，騰訊股價可能下調，但估計下調幅度唔會有舊經濟股咁大。我會設定止賺位，若恒指由高位跌兩成，我會即刻清倉。

Kitty：你講嘅高位係幾多點？

P：升市莫估頂呀！

彩兒：我知Peter幫父母管理緊投資組合，早前恒指突破28,000點，佢就重組佢哋嘅強積金組合，揀咗騰訊持倉比例最高嘅積金。

Kitty：Peter，除咗騰訊，你仲睇好啲咩？舜宇光學（02382）剛拆細，每手入場費萬幾蚊，買得過？

P：No，iPhone X都炒完，市場仲估iPhone X會喺年中停產，相關蘋果公司概念股都會遭殃。我最近買咗南方中國新行業（03167），呢隻ETF追蹤標普新中國行業指數，主力投資科技及消費股，包括阿里巴巴（美股：BABA）及騰訊等。

科大 Kenneth：租金回報11厘美國樓值博

K：港股升咗咁多，我用一、兩成資金短炒藍籌股期權，包括中國平安（02318）、滙豐控股（00005）及建設銀行（00939）等，捕捉大市升浪。

彩兒：你覺得個市幾時先升完？

K：目前我身邊唔炒開股嘅朋友都開始留意新股，但仲未入市，所以我感覺股市冇咁快爆煲，預計先會有4,000至5,000點小回，之後再爆上。

Kitty：點解唔All-in藍籌股？

K：冇計啦！我好鍾情細價股。最近有炒中化化肥（00297），見佢轉讓青海鹽湖股權予母企，有炒作空間。除咗股票，我仲有隔山買牛，兩年幾前用咗8萬至9萬美元購入美國費城物業，雖然物業升值潛力唔高，但租金收入幾穩定，年回報逾11厘。

彩兒：喺美國買樓咪可以飛過去度假囉。

K：都係嘅。嗰時決定買美國樓，而唔係香港樓，係因本金有限，等有多啲錢，先喺香港買自住物業！唔少香港人有能力畀首期，都上車無望，就係過唔到壓力測試。

城大 Ricky：炒股次要自我增值行先

R：講到入市炒股，我都係跟家人買，自己冇咩心得，都係揀藍籌股。港股升勢強勁，我買入滙豐控股（00005）及香港交易所（00388）等。我亦有抽新股，但抽唔中！股票方面，總投資金額近10萬元。

Kitty：你有咁多股本，令人好羨慕呀！

R：資金都係嚟自利是錢、兼職補習收入。仲有啲就係家人借住畀我先。不過，買股票都係以學習心態，贏輸對我嚟講唔係好緊要。其實，我更想投資喺自己身上，增值自己。我對語言學習好有興趣，依家學緊西班牙文同德文。

科大 Peter

科大 Kenneth

城大 Ricky

中大 Teresa：Fb騰訊夠生活化必入

T：上年年底有朋友介紹我玩Crypto，我就試吓，用幾萬元向佢買以太幣。我覺得自己依家係Nothing to lose，同埋趁區塊鏈同比特幣咁Hit，梗係把握時機，喺泡沫爆破之前賺得就賺！

Kitty：你估Crypto市場幾時爆？

T：由依家至十一月、二十國集團G20會議開幕之前，我估仲會升一浸，所以我依家不斷大量入貨，趁低吸納，到十一月就會沽一半先，因G20應會傾點監管比特幣。

彩兒：最近中國同韓國強力監管虛擬貨幣，人行都話要禁止為虛擬貨幣交易提供服務，韓國推虛擬貨幣交易實名制，現有非實名帳戶全部停用，令比特幣慘跌。

Kitty：你又係非Crypto唔買？

T：我有買開同自己生活相關嘅股份，如Facebook（美股：FB）同阿里巴巴，兩者用家多，即係掂啦！早排又用咗幾萬蚊喺360元買入騰訊，因騰訊走在科技尖端，其微信支付廣泛應用，掂啦。

彩兒：聽講內地人喺夜市買串燒都用微信。

中大 KK：加密幣未起泡仍有機

彩兒：比特幣一七年底升穿二萬美元，但唔夠兩個月就曾失守一萬美元，聽講你All-in加密貨幣（Crypto），驚唔驚一鋪清袋？

KK：比特幣正處牛市調整期，依家先係年頭，仲有得追，唔排除一八年升幅追得上一七年。策略方面，就目前形勢，我會以退為進，買賣虛擬貨幣Tether同比特幣，希望保住其美元計價的價值。近期1個Tether嘅價值約等同1美元。我仍睇好比特幣，若佢要死，一早死咗，各國仲使咩研究點監管。政府想監管，可能諗緊點抽稅。我依家等機會，勢要喺Crypto贏錢，唔炒其他。

Kitty：唔分散投資，唔會太高風險咩？

KK：炒比特幣本身就係高風險、高回報。

彩兒：點睇港股同美股？

KK：我睇恒指上40,000點！美股牛市應該仲會維持一段時間，仲有得升！直到股票嚴重高估，影響實體經濟產出，嗰時就會有大調整，我估會喺二○年前。我亦會留意住VIX恐慌指數，因一般股災前，指數會突然衝高！

Kitty：即係股市有Bubble？

KK：點止股市，直情Everywhere Bubble！無限量寬惹來嘅禍，依家股樓債市都有泡沫，只有Crypto冇！Crypto市場太細，仲係一個BB，BB成長得快，好正常。你照計唔會話一年高20cm嘅BB有病啩。