Market Insight：中資航空股升勢過急

大摩話內地金融去槓桿，預料長期利率會處於高位一段時間，內銀股會因此得益於淨息差擴闊。睇法好有新意？答案必然唔係，因為中國減低放水力度，由舊年十一月中開始，十年期中國國債孳息經已衝穿4厘，近個幾月都係3.88至4.12厘之間浮沉，企住喺三年高位，銀行息差有改善，內險的定息收入有進帳，問吓坐住證券行內的股友無不琅琅上口。

內銀板塊強得有理

不過，港股衝破歷史高位31,958點之後，在缸邊等入市資金確實唔少，缺的就只是炒作題材。故此，大摩以舊酒新瓶的理由調高內銀目標價，市場亦一呼百應，「中農工建」四大國有銀行上周五升幅介乎3.9至5.6%，三隻破頂，僅剩工行衝上7.4元，差少少平咗上周初高位，未有更上一層樓。

講到底，個市去到三萬三，仲有未夠10倍市盈率的強勢股，假如你係基金經理畀你坐盤，喺十年難逢一閏的大時代，唔通唔跟！

近排美金弱過藥煲，美匯指數跌穿90的心理關口，落到三年新低之後彈都唔彈。「侵侵」做咗美國總統一年左右，美元購買力已經累積失去咗一成五，歸根究柢，「侵侵」的稅改雖然有利美國企業擴大本地投資，招請更多本地職工，可是政府大減稅之後，初頭財政收入必然水瓜打狗唔見一截，早已突破20萬億美元的美國債務，勢必水漲船高，美金唔弱就假。不過，站在「侵侵」同美國財長立場，兩個都想以弱美元刺激出口及經濟，依家個勢啱晒佢哋胃口。

弱美元最得益是航空股，最近排住上跑道起飛，不過，大家都唔好完全漠視弱美元之下的另一個風險因素，就係隨之而來的高油價，上周五晚紐約期油高收市企住66美元的逾三年新高，短期三隻中資航空股升得急，想搭順風機不妨等等先。

A股ETF具值博率

強勢股不斷破頂之下，仲有乜穩陣嘢好買？目前大環境係歐美股市不斷創新高，炒得咁上下，近排有迹象資金開始捧番落後的新興市場。依家A股的滬綜指比起一五年大時代高位5,178點仲有一段距離，人人都知的因素，例如中國經濟增長經已觸底回穩，進入L形橫行形態；今年A股正式入摩，可以預期外資持貨意欲會逐漸加強；加上人民幣升值的大方向，掉番轉頭A股有炒落後的可能。

如果目標想博未來一年，可以穩穩陣陣咁想要一成以上回報，古勝認為不如諗吓兩隻A股ETF，就係南方A50（02822）及安碩A50（02823）。

古勝