絲絲講場：索羅斯狂噬Google Fb

轟壟斷營銷損市場經濟

索羅斯話，呢啲公司聲稱自己促進資訊流通，實質幾近壟斷，佢哋利用喺平台徵集所得資訊，提供綑綁式服務，以歧視性定價去牟取暴利，損害市場經濟。

索老指，佢哋設計方便易用嘅社交平台，令用家不斷為平台提供內容，公司利用資料與內容去賺大錢，但就拒絕為內容付費，亦唔會為平台內容負責或「上身」。

更甚嘅係，佢哋為達私下嘅商業目的，專登設計到啲平台令人上癮，好似賭場引賭仔沉迷賭錢。佢哋令平台用者放棄自由意志，由公司營造注意點，令人不知不覺間思維與行為受影響，阻礙創新，威脅思想自由民主。

索羅斯話尤其係數碼年代成長嘅年輕人，當失去自由意志，關注啲乜只操控喺幾間巨企手上，情況比小說嘅極權世界更甚。

佢促請各方加強規管，話呢啲平台嘅老闆仲自以為係宇宙嘅主人，今次達沃斯大會就最啱宣布佢哋「死期到」。

查實，阿大鱷自己一早已經身體力行掟貨，上季減持咗77%嘅Facebook股份，總值成1,870萬美元（約1.45億港元）o架！

余絲韻