Market Insight：中資券商股選擇吸納

在內銀及騰訊（00700）尾市齊齊發功下，港股在收市競價時段嘜到去31,983點新高收市，升78點，主板成交增至1,782億元，即使撇除碧桂園（02007）配股上板，交投都有1,700億元以上。港交所（00388）升2.4%高收295.6元，同一五年大時代高位298.65元只一步之遙。

股王騰訊再創新高，升1%報449元，4.2萬億港元或5,400億美元的市值，將近排走勢麻麻，周二晚市值5,183億美元的Facebook進一步拋離，穩坐全球五大市值公司寶坐。

散戶要定好落車計劃

嚟緊下半年，港交所打晒開口牌為同股不同權公司上市開綠燈，傳聞小米的2,000億美金估值，開頭聽到得啖笑，但睇睇吓近排個市氣氛咁熾熱，真係唔出奇。

作為新經濟代表的騰訊，以及港交所必然因為新措施火乘風勢，但睇番兩隻股票一八年預測市盈率不相伯仲，騰訊56倍，港交所53倍，現價古勝真係唔敢大大聲叫人買，不過，有句英文「Don't argue with success」（唔好同成功鬥氣），家陣股民殺得性起，講都唔會聽，但要記住有關因素早就開始浸透在高昂估值身上，假如個市短期高位反覆，記住要識落車。

佣金收入料有所改善

中港股市氣勢如虹，落後股票愈來愈少，周一叫大家睇實近排北水密密吸幾隻中資券商，一係唔炒，昨日一炒就飛天，中信證券（06030）升8%報19.5元，返回兩年多高位，中國銀河（06881）升5.8%，海通證券（06837）升4.4%，HTSC（華泰證券）（06886）升3.1%，廣發証券（01776）亦升2.1%。

唔少魚缸友視券商股係升市藍燈籠，次次輪到佢個市都「頂頂哋」，但事實A股旺番唔少，券商佣金率開始企住唔再跌，都利好中短期佣金收入。不過，好似中信證券兩支大陽燭有少少追唔落，都係傾向昨日升得少啲兩隻，HTSC同埋廣証。

內房抽水潮窒礙升浪

碧桂園宣布先以每股17.13元配售4.6億股，集資78億元，再發行本金156億元零息有抵押擔保可換股債券，兩項目合計集資233億元，是繼融創中國（01918）及周初批股的中國金茂（00817）後，又一內房加入抽水行列。

碧桂園去年合約銷售達5,500億元人仔，為集資78億元，市值單日唔見咗208億元，抵唔抵見仁見智。上月集團大股東楊惠妍多次在街外增持，作價不過12.5至13.1元，一個月唔夠升四成六，加埋唔等錢使都照伸手，似乎係大股東認為到價的徵兆。昨日大升市跌破批股價，短期內房股升浪睇怕都經已差唔多。

古勝