絲絲講場：交易大堂變博物館 蔡太捐珍藏撐場

金融大會堂將設有不同區，可做展覽廳、論壇、酒會、上市儀式同投資者活動等，各區可以互動。另一區係博物館，初期只會有基本展品，之後再慢慢增加展品。

港交所行政總裁李小加早前寫信畀市場人士，希望佢哋捐出或借出珍藏畀「博物館」。「股壇老行尊」蔡陳葆心（蔡太）收到小加來信後，應承捐極具紀念價值嘅「橙背心」、「交易飛仔」，及金銀會經紀名冊等畀博物館。

年初五揭幕 公眾須預約

蔡陳葆心囝囝蔡思聰話，佢媽咪愛收藏，同交易所關係好，做過當時嘅聯交所第一副主席，當然會捐出珍藏。若港交所搞捐贈儀式，媽咪亦會出席。

金融大會堂於年初五開幕。絲絲關心市民可唔可以參觀金融大會堂內嘅「博物館」。據悉，參觀細節待定，應可開放予公眾，但必須預約，及設導賞參觀，即係有職員接待同介紹；但因保安關係，Walk In就未必得。

今年證券界新春團拜將會於二月廿六日舉行，應該會係金融大會堂開幕後首個大型經紀活動。

余絲韻