絲絲講場：阮國恒許願港FinTech唔好落後
金融管理局副總裁阮國恒出席亞洲金融論壇，席間主持人同一眾嘉賓大玩問答大賽，當被問到最想讀嘅課程，阮國恒諗都冇諗就答係「行為科學」，而最鍾意睇嘅書，阮國恒竟然答係巴塞爾委員會關於銀行發展金融科技（FinTech）嘅文件，仲反問主持人呢份文件算唔算係一本名著（Does it count ?）。
阮國恒果然係好醉心協助發展香港金融科技，佢仲話如果可以向小精靈許願，願望係「香港唔好再畀人話係FinTech發展落後」。不過當主持人問嘉賓會點運用最近炒到鬧哄哄嘅比特幣（Bitcoin），花旗銀行香港區總經理伍燕儀話會用嚟買沙律，阮國恒就立即打趣話 ：「唔好話畀我知！」
想創業 搞中小企貸款
至於如果唔撈銀行監管，阮國恒會做咩工？佢就話，會開間初創企業，企業業務主打係中小企貸款，原因係想協助中小企業營運咁話喎！
余絲韻