絲絲講場：8新股掛牌要人流管制

港交所（00388）話見尋日咁多公司上市，所以畀公司揀上晝或下晝場，不過分兩場唔係第一次，以前都試過喎。

晉安王家揚拖未婚妻

雖則有得揀，但點解澳門承建商恆宇集團（02448）要揀下晝先敲鑼？原來上晝場有人流管制，港交所限咗上晝場每間公司入場嘉賓人數係二十三位，恆宇主席謝鎮宇話佢哋嘉賓實在太多，得二十三個位唔夠，所以寧願揀下晝敲鑼。而絲絲眼見恆宇至少八十幾位嘉賓嚟咗，聽聞上市儀式後，佢哋仲出動到旅遊巴由港交所接載嘉賓去澳門碼頭添。

正榮地產精緻模型

森浩集團貴氣手袋

講番朝早，雖然限咗人數，但現場氣氛不減，仲好熱鬧添！好似新加坡資產管理公司杰地集團（08313）無論祝酒定係影相，集團上下齊齊舉手歡呼喊「Hey」，睇嚟集團成功上市，心情好興奮。

咦！絲絲仲見到「馬場女神」Christine，查實Christine係本港物業投資公司晉安實業（02292）執行董事、財務總監兼公司秘書王家揚嘅女友，Oops唔好意思，應該係未婚妻至啱，事關王生近日宣布封盤了！Christine同本身係馬主嘅王家揚近年拍拖入馬場，引來唔少龍友同網上馬迷粉絲，尋日孖住出席上市儀式，不過無上台影相。

紀念品多 放滿兩張枱

尋日唔止嘉賓多，港交所收嘅紀念品亦多到放滿兩張枱。其中內地房產公司正榮地產（06158）送咗旗下樓盤「正榮府」模型畀港交所，做工仲相當細緻。

港交所仲收到個手袋添！邊個送？就係主打網上銷售手袋嘅森浩集團（08285），佢哋主席邱亨中早前仲向絲絲透露，試過親自設計手袋，可惜被佢嘅設計團隊打回頭，唔准推出市面，所以覺得佢嘅團隊係專業而可靠喎！

至於物業開發商光大永年（03699）就送水晶牛畀港交所，寓意股市大漲，一路牛市。唔通就係咁，旺起港交所尋日股價一路上！

余絲韻