Market Insight：中銀香港穩健之選

港交所（00388）上過280元，惟最終倒跌收市，報272.4元，跌0.87%，成交達38.9億元。真係要調整，有冇機會落番250至260元畀大家上車？照計以呢轉升浪由220元升到上280元，真係要有次似樣的調整，見番250至260元又唔係咩稀奇的事，反正以超買後的修正來看待，中長線樂觀看法並未有受動搖。

金飾股有短炒條件

呢轉升市，中資股可以話係主力，但唔係個個散戶都咁有「吉士」，幾百蚊走入去追股王騰訊（00700），或者兩百幾蚊去追港交所。慶幸今轉升浪就連估值低迷的內銀股都生猛番晒，真正惠及不少長線揸住食息的散戶，過時過節都鬆手啲，香港零售市道亦間接可受惠。

博大市差不多到浪頂，部分市場資金轉戰落後股，不妨留意零售股表現。見近期國際金價表現唔錯，如果中美打起貿易戰，市場風險胃納下降的話，應該更有利黃金投資氣氛。加上時近中國農曆新年，又係消費旺季，不妨睇睇金飾股。

六福集團（00590）近兩周股價由34元回落，昨日收報31.9元，與近兩年的升軌支持30.8元相距不遠，可留意撈貨機會，目標再試衝34元關，下方支持宜守30元。板塊中還有周大福（01929），去年次季以來一直守在8元邊之上，上方阻力在9.2元，若人氣有改善，亦可留意短炒機會。

大藍籌之中，每次指數上升，中國移動（00941）表現都類近Put輪，股價不升反跌，雖然幅度細，但其股價逆市走向的「藍燈籠」形象似乎已深入股民心中。

中移擔當避險對象

好似昨日指數低收，中移就嚟上升0.96%，收報78.5元。不過，若然一月下半場市場真係開始波動，其實中移確實有機會成為避險對象，一來股價冇咩升過，二來公司收益基礎穩健，唔係搏殺型，但勝在坐得安樂。

如果覺得後市仲有得升，唔使太過保守，藍籌中攻守兼備的，古勝認為中銀香港（02388）亦屬可取。中銀股價近日成功突破自去年中的阻力39至40元水平，上周五見過新高41.6元，短線唔排除會隨市況調整回試40元關承接，若守穩其上分注買應該都仲有得諗。畢竟兩地金融活動日益頻繁，資金互動規模趨增，中銀係得益者，坐中長線博財息兼收，有心唔怕遲。

古勝