絲絲講場：分析師跳K-pop紅過侵侵

選舉夠150票跳晒成首

話說大和電力板塊研究主管葉捷賢（Dennis）最近搵太太幫佢拍片放上網，係Dennis本人跳南韓Big Bang嘅大作《Bang Bang Bang》，到尋日傍晚條片已超過8,000個Views！

全片分幾鐘，片尾字幕話，如果佢喺某分析員選舉入面攞到150票嘅話，就會跳晒成首畀大家睇喎。

佢跳舞時幾咁認真嘅眼神，睇得出佢心中有團火。原來Dennis小時候住過木屋，草根家庭出身，無背景，靠嘅只有「知識改變命運」。

Dennis 22歲大學工程系畢業撞正沙士，幸好入到間大公司工程部門，佢每日返工坐車經過中環IFC（國際金融中心），夢想入投行做「吸收一下貴氣」，所以辭去穩定職業，返回校園讀MBA，一邊讀，一邊搵到投行工。

最後Dennis做埋分析員，每日朝七晚十一努力工作，放棄玩樂，卒之畀佢捱到主管級，同埋攞到最佳分析員首三位榮譽。今年佢37歲，為咗更進一步，所以就有呢段勁舞片，望打響名堂，然後大家先會留意到佢分析嘅內容。

推介回報率跑贏行家

聞說佢上年推介22隻股票，平均回報率有21%，跑贏行家平均14%嘅回報率。

跳K-pop呢招究竟使唔使得？聽講早兩日喺彭博機針對佢履歷嘅Search，仲多過特朗普！

余絲韻