孖妹S檔案：老手與新秀 炒股點食「腦」？
港股連升十幾日，唔少散戶賺到笑，所謂辛苦搵來自在食，咁啱又天寒地凍，酒樓餐廳自然爆晒棚，孖妹都想大魚大肉，可惜未賺夠，惟有食個飯盒頂住檔，兼極速搵專家教路。先向投資界老手請教炒股策略，再搵90後投資新秀學量化交易，相信只要學齊以上秘技，必定可以賺番夠本去食好嘢。
靠人腦：運用「價值投資法」揀股
林：國農證券董事總經理 林家亨（Simon）
彩兒：Simon Sir，你從事股票研究廿幾年，投資經驗豐富，聽聞你上年來回炒騰訊控股（00700）40次，賺幅好和味，究竟你有咩揀股獨門秘方？
林：利用基本分析去揀股，再睇宏觀經濟。港股第一季應該會向好，順勢而行贏面會高啲。
彩兒：咁咪即係價值投資法？若分析宏觀經濟，要睇啲咩呢？
林：政治！特別係美國政經局勢，其對中港股市影響大。政治有助預示形勢，大家可一早諗定對策，做好準備。好似早排通過嘅稅改，可減低唔少美國跨國企業嘅稅務開支，變相增加企業盈利，但措施只係一次過，未見持續，喺一八年打後，可能有新稅制出台，到時再迎接另一個未知數。
Kitty：政策話變就變，市場咪無所適從？
林：政治一向唔簡單。美國總統特朗普嘅稅改獲通過，推翻咗奧巴馬醫保計劃，但一八年十一月美國將有一個中期選舉，共和黨喺參議院嘅兩個席位，一旦被民主黨搶走，就會變成跛腳政府，皆因參議院掌管聯邦政府財政決策權，若民主黨堅持唔批錢，任何政策都會流於虛無。
分析經濟 尤其中美
彩兒：跛腳政府！共和黨嘅管治威信咪蕩然無存？
林：係，後遺症仲會接二連三，若國民對現屆政府不滿，共和黨喺美國總統大選冧唔到莊，由民主黨執政，稅改打回原形，企業盈利減少，國家經濟活動收斂，屆時美股九年半嘅牛市會告終，港股亦會受拖累。
熊市一旦開始，最少要年幾兩年先會終結，所以大家下半年宜審慎，最好係超短炒，同時要睇位沽貨，留番一、兩成Cash，隨時靈活轉身走人。
Kitty：點解美國成日引發熊市源頭？○八年金融海嘯嘅慘況我仲歷歷在目。
林：當時雷曼兄弟破產，好多投資者同銀行因買咗涉及雷曼債券嘅信貸違約掉期（CDS），要承受債價暴跌嘅損失！所以話跌市通常由不明朗因素引起，大家要時刻提高警覺！
彩兒：怪就怪美股同港股嘅關係密不可分。
林：美國嘅政治情況明顯較中國不穩定，因美國奉行民主選舉制度，民意影響政府施政，令大家成日估估吓，到底總統選舉承諾純粹係政治手腕，定真係會兌現嘅諾言。中國政局就穩定啲，提倡民有恒產，即係要盡量令國民有田有地有屋，安居樂業，國民就唔會有咁多不滿。因此，我認為內房夠穩健，完全冇爆破嘅迹象。
港地產股宜吼位買
林：縱然內地樓市有限售措施，但長遠對內地樓市未有太大影響。樓市熾熱嘅源頭嚟自美國量寬政策，央行大量印鈔，貨幣貶值，市民只可以棄現金買磚頭。
Kitty：我仲未上到車，點算？
林：若夠錢上車，亦有自住需要，我建議買樓。租樓始終唔划算，幫業主供樓。另外，美國加息步伐緩慢，香港按揭息率亦只會穩步向上。
Kitty：咁嘅環境，咩股份值得買？
林：部分香港地產股，包括新鴻基地產（00016）、九龍倉集團（00004）同領展房產基金（00823）等，都可以吼位再入。我認為，第一季港股應該會做好，所以我睇好香港交易所（00388）同友邦保險（01299），友邦可以等佢調整完買入，股價喺50天線有大支持。
至於滙豐控股（00005）亦唔錯！因為美國持續加息，息差擴闊，銀行收益增加，但內銀就唔太睇好。
今年回報料達兩成
Kitty：今年嘅預期投資回報係幾多？
林：若有15至20%回報係難能可貴！即差唔多四年翻一番，十二年後就有九倍，所以愈早投資愈好。
此外，都要留意其他投資風險，如北韓會否搞出大頭佛，比特幣仲值唔值錢，英國脫歐進展等，但市場仍未出現重大威脅，大家唔使太驚。
撳電腦：「量化交易」用數據部署
蔡：香港程式交易研究中心總裁 蔡嘉民（Calvin）
Kitty：聽講你上年幫公司操盤大賺近五成，依家資金滾至300萬美元，勁！你好似有開班授徒，不如收埋我呢個電腦白癡學生啦。
蔡：Ok呀，你嚟Sit我堂啦。（孖妹入到班房坐低，發現男女學生比例為8：2）
今堂我會教量化交易概念，即係靠自己嘅市場知識、交易經驗同創意去構思交易策略，或者喺市場上尋找規律，然後用歷史數據回溯測試（Back-testing）去驗證。
判斷策略是否可行
蔡：運用呢個策略，睇吓佢過往嘅勝率、年利率、連續獲利同虧損幅度等，從而判斷策略嘅賺錢能力同可行性。
彩兒：不如畀個例子吖。
蔡：我早前好奇「五窮六絕七翻身」係咪有根有據，用咗過去幾年嘅數據做Back-test。若歷史講明真係有呢個趨勢，照道理投資者喺六月撈底，勝算應該會較高，但我最後發現呢個概念純屬以訛傳訛。呢個反面例子帶出嘅訊息係，當策略唔Work，就唔好Follow。
Kitty：整個Work嘅嚟吖。
蔡：好呀！大市成交超過1,000億元，港交所股價通常會向上。有咗呢個小結論，要增加勝數，大家可以再優化佢，轉吓啲參數數值，例如增加成交額至1,200億元，或者調整持貨日數等。
其他策略包括趨勢跟蹤（Trend Following）同均值回歸（Mean Reversion），趨勢跟蹤即順勢而行，均值回歸則相反。趨勢跟蹤勝率低，但每次獲利幅度大、虧損幅度小；均值回歸則勝率高，但每次獲利幅度小，虧損幅度大。
Kitty：Back-testing即係模擬交易？
彩兒：唔係，模擬交易係用即市數據模擬即市交易，有實戰感覺。所以好多人都做完Back-testing會再做模擬交易，Make Sure策略係Work先用真錢玩。提提你，量化交易策略建基於歷史數據，唔可以預測未來，就算過往用呢個策略係幾掂，都唔保證之後會Work！
Kitty：我知，數據要愈多愈好，涵蓋愈多歷史變數，將來有咩突發事件，程式都可以同你講：「我有咩風浪未見過吖！」哈哈！
蔡：講得啱，投資買賣其實都係受人嘅情緒影響，但情緒係一啲自然反應，唔會點變，所以量化交易就假設喺大風浪時，投資者嘅追揸沽反應會重複，股價走勢亦會重複。
不受主觀感覺影響
彩兒：量化交易最正嘅就係，睇數據做人，唔被主觀感覺影響投資判斷，唔使心慌慌。
蔡：啱！量化交易進行中，唔係情非得已都唔會干預；一旦要干預，就會全部放棄，咁做多數係因為之前從未輸過咁多。
Kitty：思考策略時，係咪要先有心水股？否則大海撈針，幾時先搵到爆升股？
蔡：所以我哋會定下篩選條件，包括有一定成交量嘅股份，以及其買賣差價（Bid Ask Spread）唔可以太大，免得有滑價（Slippage）問題出現。
股友Buy邊套方法？：散戶Alan 1年炒股經驗：程式交易好處多
我學緊量化交易Back-testing，其實程式語言唔難學。程式交易比人手Trade更可靠，因每一個交易決定都有根有據，方便檢討賽果。再者，程式交易激發新思維，運用新策略，或能鑽研出罕為人知嘅賺錢秘訣。
不過，作為程式交易新手，我會先試水溫，僅用兩至三成股本，按成功通過歷史回溯測試嘅策略投資，用回報去判斷其可行性。就算程式交易好Work，都唔會取代價值投資，因價值投資法更適合長線投資。
散戶Will 5年炒股經驗：不同策略一齊用
我鍾意用價值投資法選股，再用歷史回溯測試搵入市位。量化交易從數據思考策略，可以減少主觀判斷嘅錯誤。我鍾意炒大價股，因為呢類股份嘅成交多，而且股價比較少受到莊家嘅財技所左右。
喺近排呢個大升市，我應用咗順勢而行嘅策略，即係升市莫估頂，喺25元買入中國海外發展（00688），帳面有賺。同時，我亦持有滙控，受惠美國加息，息差擴闊，以及其為北水Lover，料股價會炒上。
Kitty、彩兒