Market Insight：石藥研發能力高一線

美股升勢凌厲，滬綜指重返3,300點後，一副慢火煎魚向上格局，在北水持續流入之下，港股睇唔到唔升的理由，唯一令人一路買一路驚，是今輪升浪實在升得急，完全無調整機會。大牛市之下，投資者更係漠視一切的負面消息，近日美國傳緊「侵侵」對華貿易政策短期可能有辣招出台，另一邊廂，上周傳中國減少買美債，擺出你做初一、我做十五姿態。

升市無謂去估頂，太過杞人憂天注定難贏大錢，總之股友們要預咗炒到尾水輸番尾注出去就算。

熱炒新股有胡要食

本周多隻新股陸續登場，主角必然係超額認購多達1,568倍，於今日掛牌的希瑪眼科（03309）。上周五暗盤價去到4.97元，比招股價2.9元升七成一。當然，首日熱爆並唔代表往後表現，去年十一月上市的雷蛇（01337）係最佳例子，依家只係高招股價3.88元3仙咁大把。股民謹記有食要食，無謂同掛牌初透支過度的新股談戀愛。

希瑪掛牌前，上周醫藥股已經輪住落鑊，四環醫藥（00460）升6.5%，中國生物製藥（01177）升5.6%，古勝心水復星醫藥（02196）升5.5%，綠葉醫藥（02186）則升4.1%。反而睇到早兩個星期熱炒的金斯瑞生物科技（01548）喺早市升過8%後，收市縮番落嚟只升得1.5%。

不過，在下都係嗰句，有資源同能力做新藥研發，甚至進軍歐美市場的，先值得畀高估值，博佢有朝一日成為中國的輝瑞、默克，如果只揀一隻，反而想睇番上周五逆市跌的石藥集團（01093）。

雖然話就話目前北水僅佔港股成交大約一成，但有參與的看官，大抵都感覺到北水控制大局的事實。內地湧港資金，往往集中注碼在特定的炒作主題，形成買乜升乜情況。依家做股市分析，考慮公司基本因素變得其次，更多時間花在揣測北水喜好。

券商股估值仍吸引

中港互聯互通原意希望以客觀分析，機構投資者主導的港股可以薰陶向來大上大落，投機情緒帶動的A股，可是發展落去，趨勢看來事與願違，長遠對港股是福是禍，等今浪港股熱潮退卻後，相信先會看到答案。

近排A股交投明顯好番，相信內地券商收入好大機會在一七年中見底回升。近排北水密密落嚟吸幾隻中資券商股，睇佢地市帳率離個底仲係唔遠，想跟北水搵食又唔想追寶尾，追啲估值太離地的股份，可以留意破晒位無蟹貨的國泰君安（02611），以及HTSC（華泰證券）（06886）同廣發証券（01776）。

古勝