Market Insight：二線內銀係時候接力

股王騰訊（00700）破完頂之後連續兩日陰燭收，撐住個市的重任已交到滙豐控股（00005）身上。不過，睇到即市超過900隻股票見紅，反映唔少人選擇開始高位食胡。大笨象單天保至尊，升2.3%收報84.05元，其他銀行股齊齊發功，中銀香港（02388）升2.5%，渣打集團（02888）更升2.9%。

中美貿易互相角力

周三晚突然傳出中國評估外匯儲備結構後，高層官員建議放緩或暫停買入美債，刺激美國十年期國債孳息閃出2.595厘高位，幾乎平咗一七年首季2.6厘高位，也是美股終於有日唔升的主因。睇番去年首十一個月，中國對美國貿易順差5,272億美元，對比前一年「侵侵」上場前再多一成二。

甚麼「百日會談」，國家主席同「侵侵」政府坐低傾點去收窄貿易差距，結果得個講字。中國點樣去消化驚人的貿易盈餘？唔通唔買美債走去買Bitcoin？近幾日美國傳「侵侵」準備於新一年對華貿易立場硬起來，咁啱此時話唔買美債，似乎擺政治姿態居多。不過，考慮近排債市顯示美國通脹風險升溫機會增加，港股又企住高位，持重倉者多少要有戒備心態，萬一口水戰玩到擦槍走火，到時被誤傷就認真無謂。

話口未完，昨日先提過水泥股有少少貴，應酌量減減磅，轉頭內地水泥有減價消息。內地水泥網顯示，最誇張係長三角沿江熟料價格，南京中國水泥廠每噸一口氣下調170元人仔，每噸由520元急降至350元人仔。去年第四季水泥價格周期性創高位後，年初回落是預期之內，但幅度之大仍是遠超預期。

郵儲行現價仍值博

龍頭海螺水泥（00914）昨日早市開咗口43.4元歷史高位後，最終跌5.7%，穿頭破腳認真肉酸。華潤水泥（01313）跌5.9%，中國建材（03323）跌7.8%，中材股份（01893）更跌8.1%，除海螺外統統穿埋10日線，走勢已轉差，即使遲上車的都應該考慮壯士斷臂。

個市開始個別發展，古勝諗過度過，周圍的中長期債息都升緊，一線內銀股後，點都應該輪到二線內銀股發力。向來慢半拍的郵儲銀行（01658），幾經辛苦由舊年十二月底位4.03元谷底彈上嚟，連續幾日壓住響100日線4.5元樓下旗形整固，似乎係等爆上格局。留意到早兩日大和出報告，話內地去槓桿會令市場重估郵儲行優於同業的放貸能力，展望淨利息收入及資產質素都有改善，睇5.1元同畀佢跑贏大市評級。睇落現價輸面細贏面大，不妨留意。

古勝