Market Insight：石油相關股受追捧
港股氣勢如虹，雖然昨日早段突破31,000點關後有回吐，惟午後又再試圖發力，最終收報31,011點，升111點，主板成交1,334億元，創下十一連揚佳績！呢轉升浪確實比預期為強，跟得到的當然高興，但跟唔到其實都唔使太過自責，畢竟投資要說服得到自己，先至可以堅持行事，沽低咗少少，就當留啲位畀人賺，賣仔莫摸頭；認為沽錯咗，就認錯入市買番，反正昨日的決定有昨日的理由，魚缸天天在變，別給自己太多無謂的心理負擔。
騰訊控股（00700）事別唔夠兩個月又再破頂，股價一度抽到上446.4元，收報443.8元，升1.1%，成交達108億元。不過，技術上見到14日RSI現明顯背馳，加上消息面方面短期未見有重大利好因素，所以短線持貨可考慮趁高獲利，候回吐再睇位部署。
北水續加注滙控
愛股港交所（00388）繼續做好，昨日高位上過270元，係咪見頂？畢竟港交所現價與一五年高位311.4元仲有段距離，古勝都係嗰句，揸長線的話就繼續坐順風車，少理短期波動。如果短線炒出炒入，按理股價由230元水平升上嚟累升幅度超過15%，短線先食一轉的理由亦算充分。
此外，大笨象滙控（00005）已連續第六個交易日企在80元樓上收市，昨日收報80.95元，升0.56%，成交16.76億元。技術上，滙控股價已確認突破73至80元的上落區，照計股價唔會就咁止步，相信在80元整固過後，可繼續反覆試高，目標上試88至90元區域，78至80元由阻力變成支持區。睇北水紀錄，昨日大笨象經港股通有逾7億元淨買入，跟住北水步伐，應該有利可圖。
國際油價在近日高位整固，「三桶油」反覆偏穩，昨日見到油服股有表現，宏華集團（00196）升5.1%、百勤油服（02178）升8.4%、中海油田服務（02883）升2.2%、海隆控股（01623）升10%。事實上，如果石油行業景氣持續向好，市場憧憬今年石油行業的資本開支會較鬆動，將惠及下游，包括油田服務行業，再加上油服股的波幅會較大，啱炒家胃口，故見資金聚炒油服股，並不出奇。
華保挑戰阻力位
再睇最近油組都表態，話唔會因為伊朗事件而恢復增產，咁短期供應面冇太大變數，時值又係能源消費旺季，油股同油服股短期有望繼續吸引資金停留炒作。
呢轉升市，內險股似乎有啲落後，昨日見到中國平安保險（02318）同中國太平（00966）升逾2%，新華保險（01336）升1.5%。睇番華保股價走勢，近兩個月在57至58元水平形成雙頂阻力，惟同時底部支持見上移，若然呢轉反彈成氣候，就睇睇能否突破58元關，回吐初步支持在52.2元。
古勝