絲絲講場：美圖相機App 識得變「髮」
美圖公司（01357）旗下王牌美顏App美圖秀秀出晒名執靚個樣，不過近日好多絲打都反映，美圖秀秀已經唔可以再滿足到佢哋嘅需要，有好多姊妹認為執靚個樣後，唯一缺點係個樣靚就靚嘞，但就連自己都唔認得出自己！
AI分析 講求真實
美圖影像實驗室MTlab自然從善如流，近日終於借助旗下另一個美顏相機App，基於人工智能（AI）技術推出一項新嘅虛擬換髮型服務—「美顏相機髮型管家」。
美顏相機App用戶只要拍攝一張自拍照片，美顏相機可智能分析用戶嘅真實臉型，幫佢匹配最佳髮型。核心技術包括臉型分析、姿態分析、五官分割、臉部融合、美妝技術等AI技術。呢一系列AI技術，保證最終髮型效果更加真實準確。講真，髮型對外觀影響亦好重要，一個完全匹配自己嘅髮型，係令到女士們立即變靚嘅關鍵！
目前髮型管家總共包含哪吒頭、鹿角髮型、公主編髮、桃花造型等15款時下嘅熱門時尚髮型。
遲啲推男士髮型
美顏相機髮型管家未來會有更多款時尚髮型和大家見面，預算未來每一至兩星期就會有更新髮型推出，遲啲仲會推出男士髮型，照顧埋巴打嘅需要添！
美圖公司昨日收市升0.33%，收報12.24元，唔知趁住以上新功能推出，股價短期有無機會升穿14元嘅阻力位呢？
余絲韻