一七年係好特別的一年，恒指全年大升36%，波動指數更創歷史新低，除咗十一月二十二日見頂後回吐2,065點跌至28,134點外，港股全年未曾經歷過逾千點的回吐。對於好友來說，這是完美升浪的一年。即使一八年有一七年的一半表現，好友都應該收貨，但要預計一年的表現是相當困難，因為人係善變的，所以最能反映人性的股市亦可以好快由牛轉熊。
今年，政治上，沙特同伊朗關係惡化，耶路撒冷問題，都可隨時扯高油價，美國有頁岩油支持， 影響較中國為輕，所以美國若跟中國打貿易戰，扯高油價，以本傷人係方法之一，但這對香港股市就相當不利。第二是北韓問題，近日有傳中國在公海轉交石油畀北韓船隻，如果特朗普認定中國制裁北韓只係陽奉陰違，中美有機會出現不大不小貿易戰，這亦是另一個政治炸彈，必須提防並觀察事態發展。
經濟上，一七年好多人都唱好稅改對美國股市的影響，但其實稅改隱藏兩個問題。首先，得益稅改的公司，其業績改善只會係一次性。其次，係省下來的資金運用。特朗普的如意算盤係稅改後公司會將省下來的資金再投資，促進經濟，而GDP增長足以彌補政府因稅改少收的稅項，但資金是否有效運用仍有待觀察。
其實，共和黨在列根同小布殊時代都推過稅改，卻事與願違。經濟沒有顯著增長，財赤卻是激增。最終，第一個受到衝擊的必是美元。美國政府要加大發債以彌補赤字，這就必會加快全球利率升勢，所以減稅的確係短期內利好股市，但隨着隱藏的問題浮現，反會製造股市大幅回吐的藉口。
以上問題，其實早已有分析師提出來，但似乎股市對此毫無反應，而這才是最大風險。因為隨着股市繼續上升，任何一個小問題都可以被擴大，所以我對第一季表現唔敢太奢望，要先睇清楚朝鮮、 中美及中東局勢，以及市場對稅改睇法有冇改變。
由任職國際大行到創業揸莊，經歷無數金融巨浪，以識見捕捉趨勢，博高Fund，也要有Fun。
作者：微子